ប្រធានប្រតិបត្តិក្រុមហ៊ុន Ford Motor (F.N) លោក Bill Ford បាននិយាយថា សហរដ្ឋអាមេរិកមិនទាន់ត្រៀមខ្លួនរួចរាល់ដើម្បីប្រកួតប្រជែងជាមួយប្រទេសចិនក្នុងការផលិតរថយន្តអគ្គិសនីនោះទេ។
ក្រុមហ៊ុន Ford បានប្រាប់ CNN ថា “ចិនបានអភិវឌ្ឍន៍យ៉ាងឆាប់រហ័ស ហើយពួកគេបានអភិវឌ្ឍន៍វាក្នុងទ្រង់ទ្រាយធំ។ ហើយឥឡូវនេះ ពួកគេកំពុងនាំចេញឡានអគ្គិសនីទាំងនោះ”។ ក្រុមហ៊ុន Ford បាននិយាយថា “ឡានចិន មិននៅទីនេះទេ ប៉ុន្តែពួកគេនឹងមកទីនេះ យើងគិតថា នៅចំណុចណាមួយ យើងត្រូវត្រៀមខ្លួន ហើយយើងកំពុងតែត្រៀមខ្លួនហើយ” ។
កាលពីខែកុម្ភៈ ក្រុមហ៊ុនផលិតរថយន្ត Ford បានប្រកាសផែនការវិនិយោគ 3.5 ពាន់លានដុល្លារ ដើម្បីបង្កើតរោងចក្រផលិតថ្មរថយន្តអគ្គិសនីនៅរដ្ឋ Michigan ក្នុងកិច្ចព្រមព្រៀងដែលពាក់ព័ន្ធនឹងការប្រើប្រាស់បច្ចេកវិទ្យាពីក្រុមហ៊ុនថ្មរបស់ចិន CATL ដោយទាក់ទាញការចាប់អារម្មណ៍ពីសមាជិកព្រឹទ្ធសភាអាមេរិក Marco Rubio ដែលបានស្នើឱ្យរដ្ឋបាល Biden ពិនិត្យឡើងវិញនូវកិច្ចព្រមព្រៀងនេះ។
លោក Bill Ford ដែលជាចៅទួតរបស់ស្ថាបនិកក្រុមហ៊ុន Ford គឺ លោក Henry Ford បាននិយាយនៅក្នុងកម្មវិធីថា រោងចក្រផលិតថ្មនៅរដ្ឋ Michigan គឺជាឱកាសសម្រាប់វិស្វកររបស់ Ford ដើម្បីសិក្សាពីបច្ចេកវិទ្យា បន្ទាប់មកប្រើប្រាស់វាដោយខ្លួនឯង។
នាយកប្រតិបត្តិក្រុមហ៊ុន Ford លោក Jim Farley បាននិយាយកាលពីខែឧសភាថា ក្រុមហ៊ុនផលិតរថយន្តអគ្គិសនីរបស់ចិន គឺជាគូប្រជែងដ៏សំខាន់របស់ខ្លួននៅក្នុងវិស័យនេះ ហើយថាក្រុមហ៊ុន Ford ត្រូវការម៉ាកយីហោប្លែកពីគេ ឬតម្លៃទាបដើម្បីយកឈ្នះក្រុមហ៊ុនផលិតរថយន្តចិន។
លោកបានមានប្រសាសន៍ថា “ខ្ញុំគិតថាយើងមើលឃើញ ក្រុមហ៊ុន ចិនជាដៃគូប្រកួតប្រជែងដ៏សំខាន់ មិនមែនក្រុមហ៊ុន GM ឬ តូយ៉ូតាទេ។ ក្រុមហ៊ុនចិននឹងក្លាយជាមហាអំណាច” ៕
