អ្នកជំនាញកម្ពុជាបាននិយាយថា ដំណើរទស្សនកិច្ចរបស់រដ្ឋមន្ត្រីការបរទេសចិនលោក Wang Yi មកកាន់ប្រទេសកម្ពុជាគឺមានសារៈសំខាន់ក្នុងការធ្វើឱ្យស៊ីជម្រៅនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងកម្ពុជា ដែលបង្ហាញពីការប្តេជ្ញាចិត្តរបស់ប្រទេសចិនក្នុងការជំរុញទំនាក់ទំនងឱ្យកាន់តែរឹងមាំជាមួយប្រទេសជិតខាង។
លោក សឿន សំ អ្នកវិភាគគោលនយោបាយនៃរាជបណ្ឌិត្យសភាកម្ពុជាបានប្រាប់សារព័ត៍មានស៊ីនហួ ថា “ដំណើរទស្សនកិច្ចរបស់លោក Wang បង្ហាញពីសារៈសំខាន់ដែលប្រទេសចិនដាក់លើទំនាក់ទំនងរបស់ខ្លួនជាមួយកម្ពុជា” ខណៈដែល ប្រទេសអាស៊ីអាគ្នេយ៍មួយនេះ គឺជាដៃគូដ៏សំខាន់របស់ប្រទេសចិនជាយូរមកហើយ។ លោកបានបន្ថែមថា “ទំនាក់ទំនងជាប្រវត្តិសាស្ត្រ និងវប្បធម៌រវាងប្រទេសទាំងពីរមានតាំងពីសតវត្សរ៍មុន ហើយក្នុងប៉ុន្មានឆ្នាំថ្មីៗនេះ កិច្ចសហប្រតិបត្តិការសេដ្ឋកិច្ចរបស់ប្រទេសទាំង 2 បានរីកចម្រើន។
លោក Wang ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនបានមកដល់ទីក្រុងភ្នំពេញ កាលពីអំឡុងខែ សីហា ឆ្នាំ 2023 កន្លងទៅ ដើម្បីបំពេញទស្សនកិច្ចផ្លូវការរយៈពេលពីរថ្ងៃ។ កម្ពុជា ជាជើងចុងក្រោយនៃដំណើរទេសចរណ៍ក្នុងតំបន់អាស៊ីអាគ្នេយ៍របស់រដ្ឋមន្រ្តីការបរទេសចិន បន្ទាប់ពីលោកបានទស្សនកិច្ច ទៅកាន់ម៉ាឡេស៊ី និង សិង្ហបុរី។
នៅទីក្រុងភ្នំពេញ លោក Wang Yi បានចូលគាល់ព្រះមហាក្សត្រ កម្ពុជា ព្រះបរមនាថ នរោត្តម សីហមុនី និង សម្ដេចតេជោ ហ៊ុន សែន ដែលពេលនោះ សម្តេចនៅកាន់តំណែងជា នាយករដ្ឋមន្រ្តី នៃព្រះរាជាណាចក្រកម្ពុជា និង សម្តេចធិបតី ហ៊ុន ម៉ាណែត ដែលបច្ចុប្បន្ន ជានាយករដ្ឋមន្ត្រីថ្មី។ លោក សឿន សំ បានកត់សម្គាល់ថា ប្រទេសចិនបានក្លាយជាដៃគូពាណិជ្ជកម្ម និងជាអ្នកវិនិយោគដ៏ធំបំផុតមួយរបស់កម្ពុជា ដែលរួមចំណែកយ៉ាងសំខាន់ក្នុងការអភិវឌ្ឍន៍ និងការរីកចម្រើនរបស់ប្រទេសកម្ពុជា។
អ្នកជំនាញរូបនេះបានបន្តថា៖ “ដំណើរទស្សនកិច្ចរបស់លោក Wang បង្ហាញពីការបន្តគាំទ្ររបស់ប្រទេសចិន សម្រាប់ការអភិវឌ្ឍរបស់ប្រទេសកម្ពុជា និងការប្ដេជ្ញាចិត្តរបស់ខ្លួនក្នុងការពង្រឹងស្ថិរភាព និងវិបុលភាពក្នុងតំបន់។ “នេះ ក៏បង្ហាញពីការបន្តកិច្ចខិតខំប្រឹងប្រែងរបស់ប្រទេសចិនក្នុងការពង្រឹងទំនាក់ទំនងរបស់ខ្លួនជាមួយសមាគមប្រជាជាតិអាស៊ីអាគ្នេយ៍ (អាស៊ាន) ជាពិសេសនៅក្នុងក្របខ័ណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន”។
លោក សំ បាននិយាយថា ចំណងមិត្តភាពរវាងចិន និងកម្ពុជាត្រូវបានពង្រឹងបន្ថែមទៀត តាមរយៈកម្មវិធីផ្លាស់ប្តូរវប្បធម៌ អាហារូបករណ៍អប់រំ និងការផ្លាស់ប្តូរទស្សនកិច្ចរវាងប្រជាជន និង ប្រជាជន។ លោកបានមានប្រសាសន៍ថា “ដំណើរទស្សនកិច្ចរបស់លោក Wang ក៏បម្រើជាសក្ខីភាពដល់ទំនាក់ទំនងមិត្តភាពយូរអង្វែង និងភាពជាដៃគូយុទ្ធសាស្ត្ររវាងប្រជាជាតិទាំងពីរ”។ “នេះផ្តល់ឱកាសសម្រាប់ប្រទេសទាំងពីរក្នុងការពង្រឹងទំនាក់ទំនង បន្ថែមទៀត និង ស្វែងរកផ្នែកថ្មីនៃកិច្ចសហប្រតិបត្តិការ និងដោះស្រាយបញ្ហាប្រឈមរួមគ្នា” ។
ប្រភពខាងលើ បានបន្ថែមថា ដំណើរទស្សនកិច្ចនេះនឹងរួមចំណែកដល់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគកាន់តែស៊ីជម្រៅថែមទៀតរវាងប្រទេសទាំងពីរ។ លោក សំ បាននិយាយ ថា ដំណើរទស្សនកិច្ចរបស់លោក Wang ក៏បានបញ្ជាក់សារជាថ្មីនូវការប្តេជ្ញាចិត្តរបស់ប្រទេសចិនក្នុងការគាំទ្រ ការអភិវឌ្ឍន៍ក្នុងស្រុករបស់កម្ពុជា ដែលបង្ហាញថាប្រទេសចិននៅតែជាមិត្តល្អបំផុតរបស់កម្ពុជា៕
