ឯកឧត្តម ដួង ដារ៉ា ដែលជាជំនួយការផ្ទាល់របស់សម្តេចតេជោ ហ៊ុន សែន បានមានប្រសាសន៍ឱ្យដឹងថា បណ្តាញសង្គមខ្មែរ (Social Media) សម្រាប់ខ្មែរ នឹងដាក់ឱ្យប្រើប្រាស់ជាផ្លូវការនៅក្នុងខែ តុលា ឆ្នាំ 2023 ខាងមុខនេះហើយ។
ឯកឧត្តម ដួង ដារ៉ា បានបញ្ជាក់ថា បណ្តាញសង្គមខែ្មរ សម្រាប់ខ្មែរ Version.1 នឹងដាក់អោយប្រើក្នុងខែតុលានេះហើយ! ដោយក្នុងនោះ ឯកឧត្តម បានបន្តថា
នេះជាផលប្រយោជន៍មួយចំនួន…នៅពេលយើងបែរមកប្រើប្រាស់បណ្តាញសង្គមរបស់យើង។ ផលប្រយោជន៍ទាំងនោះមានដូចជា ៖
ទី 1. យើងកាន់តែបង្កើនទំនាក់ទំនងជាមួយខ្មែរគ្នាយើងបានច្រើននៅក្នុងបណ្តាខេត្តក្រុង២៥។
ទី 2. ជាឱកាសសម្រាប់បងប្អូនក្នុងការរកការងារ និងបង្កើតមុខរបរអនឡាញ។
ទី 3. បងប្អូនដែលមានមុខរបរអនឡាញស្រាប់ហើយក៏អាចពង្រីកទីផ្សារបានកាន់តែធំទូលាយនៅតាមបណ្តាខេត្តក្រុងទាំង២៥ កាន់តេងាយស្រួល។
ទី 4. សាស្រ្តាចារ្យ, គ្រូបង្រៀន, អ្នកហ្វឹកហ្វឺន… អាចបង្កើតកម្មវិធីអប់រំបណ្តុះបណ្តាលវគ្គជំនាញរយៈពេលវែងឬខ្លីតាមអនឡាញបានងាយស្រួល និងមានឱកាសរកចំណូលផងដែរ ។
ទី 5. ពាណិជ្ជករតូចធំអាចផ្សព្វផ្សាយព័ត៌មាន, ឈ្មោះទំនិញ និងសេវាកម្មនានាទៅកាន់អ្នកប្រើប្រាស់ក្នុង ប្រទេសកាន់តែចំទិសដៅ ងាយស្រួល និងមានប្រសិទ្ធភាពខ្ពស់។
ទី 6. យើងកាន់តែអាចជួយគ្នាបានតាមរយៈសកម្មភាពមនុស្សធម៍បានឆាប់រហ័សនិងមានប្រសិទ្ធភាពតាមរយៈបណ្តាញសង្គមខ្មែរ!
“នៅមានផលប្រយោជន៍ជាច្រើនទៀតសម្រាប់អ្នកប្រើប្រាស់ ដែលខ្ញុំនឹងជម្រាបនៅពេលក្រោយ។ ពិតណាស់ បើខ្មែរប្រើប្រាស់របស់យើងច្រើន គឺនឹងទទួលបានផលប្រយោជន៍កាន់តែច្រើន! (ផលប្រយោជន៍បានមកពីការប្រើរបស់គេគឺតិចណាស់)។ ជិតដល់ពេលដែលយើងនាំគ្នា បែរមកប្រើប្រាស់បណ្តាញសង្គមរបស់យើងវិញម្តង!” នេះបើតាមការបញ្ជាក់ឱ្យដឹងបន្ថែមរបស់ ឯកឧត្តម៕
