នាយករដ្ឋមន្ត្រីអង់គ្លេស Rishi Sunak បានព្រមានថា បញ្ញាសិប្បនិម្មិត AI អាចជួយធ្វើឱ្យមានភាពងាយស្រួលក្នុងការផលិត អាវុធគីមី និងជីវសាស្រ្ត។ លោក Sunak បាននិយាយថា នៅក្នុងសេណារីយ៉ូដែលអាក្រក់បំផុត សង្គមមនុស្សអាចបាត់បង់ការគ្រប់គ្រងទាំងអស់លើ AI ។
ក្នុងសុន្ទរកថាដែលមានបំណងបង្ហាញចក្រភពអង់គ្លេសក្នុងនាមជាប្រទេសឈានមុខគេក្នុងពិភពលោកលើបច្ចេកវិទ្យា AI នាយករដ្ឋមន្ត្រី Sunak បាននិយាយថាបច្ចេកវិទ្យាបានបង្កើតការងាររួចហើយ។លោកបានបន្ថែមថា ការអភិវឌ្ឍន៍បច្ចេកវិទ្យានឹងជំរុញដល់កំណើនសេដ្ឋកិច្ច និងផលិតភាព ទោះបីជាទទួលស្គាល់ថា វានឹងមានឥទ្ធិពលលើទីផ្សារការងារក៏ដោយ។
លោកនាយករដ្ឋមន្ត្រីនៅ Rishi Sunak បានថ្លែងកាលពីពេលថ្មីៗនេះ ដែលបញ្ជាក់អំពីការកំណត់ពីសមត្ថភាព និងហានិភ័យដែលអាចបង្កឡើងដោយ AI រួមទាំងការវាយប្រហារតាមអ៊ីនធឺណិត ការក្លែងបន្លំ និងការរំលោភបំពានផ្លូវភេទលើកុមារ។ លោក Sunak បាននិយាយថា ក្នុងចំណោមហានិភ័យដែលមានចែងក្នុងរបាយការណ៍នោះគឺថា AI អាចត្រូវបានប្រើប្រាស់ដោយក្រុមភេរវករ “ដើម្បីផ្សព្វផ្សាយការភ័យខ្លាច និងការរំខានក្នុងកម្រិតធំជាងនេះ”។
លោកបាននិយាយថា ការកាត់បន្ថយហានិភ័យនៃការផុតពូជរបស់មនុស្សពី AI គួរតែជា “អាទិភាពសកល” ។ ប៉ុន្តែលោកបានបន្ថែមថា៖ “នេះមិនមែនជាហានិភ័យដែលមនុស្សត្រូវខ្លាចក្នុងពេលនេះទេ ហើយខ្ញុំក៏មិនចង់ធ្វើជាអ្នកភ័យខ្លាចដែរ”។ លោក បាននិយាយថាជាទូទៅលោកមាន “សុទិដ្ឋិនិយម” អំពីសក្តានុពលនៃ AI ដើម្បីផ្លាស់ប្តូរជីវិតរបស់មនុស្សឱ្យកាន់តែប្រសើរឡើង៕
