អាកាសយានដ្ឋានអន្តរជាតិសៀមរាបអង្គរត្រូវបានសម្ពោធដាក់អោយប្រើប្រាស់ជាផ្លូវការកាលពីថ្ងៃព្រហស្បតិ៍ដោយបង្កើនក្តីសង្ឃឹមសម្រាប់ការស្តារឡើងវិញនៃឧស្សាហកម្មទេសចរណ៍នៅកម្ពុជា។ សម្តេចធិបតីហ៊ុន ម៉ាណែត នាយករដ្ឋមន្ត្រីបានអញ្ជើញជាអធិបតីក្នុងពិធីសម្ពោធដាក់អោយប្រើប្រាស់ដែលមានអ្នកចូលរួមជាង១ពាន់នាក់។
ថ្លែងក្នុងពិធីនោះសម្តេចហ៊ុន ម៉ាណែត បានមានប្រសាសន៍ថា អាកាសយានដ្ឋាននេះ ត្រូវបានដាក់អោយប្រើប្រាស់ ក្នុងឱកាសដែលកម្ពុជា និងចិនប្រារព្ធខួបលើកទី៦៥ នៃទំនាក់ទំនងការទូត ហើយប្រទេសចិនក៏ប្រារព្ធខួប១០ឆ្នាំ នៃការបង្កើតគំនិតផ្តួចផ្តើមខ្សែក្រវាត់ និងផ្លូវ ផងដែរ។
សម្តេចធិបតីបានលើកឡើងថា “អាកាសយានដ្ឋានអន្តរជាតិសៀមរាបអង្គរ គឺជាផ្លែផ្កានៃសន្តិភាពនិងជាសមិទ្ធផលលេចធ្លោថ្មីនៃទំនាក់ទំនងមិត្តភាពរវាងកម្ពុជានិងចិន”។
សម្តេចនាយករដ្ឋមន្រ្តីបានបន្តថា អាកាសយានដ្ឋានអន្តរជាតិសៀមរាបអង្គរ គឺជាអាកាសយានដ្ឋានកម្រិត 4E ដែលអាចទទួលយន្តហោះខ្នាតធំៗលំដាប់ពិភពលោកផងដែរ។ អាកាសយានដ្ឋាននេះនឹងភ្ជាប់កម្ពុជាទៅកាន់ពិភពលោក ហើយយើងសង្ឃឹមថាក្រុមហ៊ុនអាកាសចរណ៍អន្តរជាតិថ្មីៗ ។ជាពិសេសក្រុមហ៊ុនចិននឹងបង្កើនជើងហោះហើររបស់ពួកគេទៅខេត្តសៀមរាប»។សម្តេចបានគូសបញ្ជាក់ថា អាកាសយានដ្ឋាននេះ នឹងជំរុញកំណើនវិស័យទេសចរណ៍ក្នុងខេត្តសៀមរាប ហើយប្រជាពលរដ្ឋក្នុងស្រុកនឹងទទួលបានអត្ថប្រយោជន៍ដោយផ្ទាល់ជាច្រើន។វិនិយោគដោយក្រុមហ៊ុន Angkor International Airport Investment (Cambodia) Co., Ltd. ដែលជាសាខារបស់ក្រុមហ៊ុន Yunnan Investment Holdings Ltd. អាកាសយានដ្ឋានអន្តរជាតិទំហំ៧០០ ហិចតា ត្រូវបានរចនាឡើងតាមរចនាបទស្ថាបត្យកម្មខ្មែរ។
ជាមួយនឹងផ្លូវរត់ប្រវែង ៣,៦០០ ម៉ែត្រ អាកាសយានដ្ឋានអន្តរជាតិសៀមរាបអង្គរ បច្ចុប្បន្នគឺជាអាកាសយានដ្ឋានដ៏ធំបំផុតរបស់កម្ពុជា និងជាច្រកទ្វារដ៏សំខាន់ទៅកាន់ឧទ្យានបុរាណអង្គរដែលជាតំបន់ទេសចរណ៍ដ៏ពេញនិយមបំផុតមួយក្នុងប្រទេស។
លោកម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជា បាននិយាយថាអាកាសយានដ្ឋានអន្តរជាតិសៀមរាបអង្គរ នឹងអាចទទួលអ្នកដំណើរបាន ៧លាននាក់ក្នុងមួយឆ្នាំចាប់ពីឆ្នាំ ២០២៤ និងរហូតដល់ ១២ លាននាក់ក្នុងមួយឆ្នាំចាប់ពីឆ្នាំ ២០៤០។
លោកបានបន្តថា៖ «អាកាសយានដ្ឋានអន្តរជាតិសៀមរាបអង្គរនឹងជំរុញកំណើនសេដ្ឋកិច្ចកម្ពុជា រួមមានវិស័យអាកាសចរណ៍ ទេសចរណ៍ និងការវិនិយោគ ក៏ដូចជារួមចំណែកបន្ថែមទៀតដល់ការកាត់បន្ថយភាពក្រីក្រ»។
ឯកឧត្តមបានលើកឡើងទៀតថា៖ «យើងមានទំនុកចិត្តថាអាកាសយានដ្ឋានថ្មីនេះនឹងតភ្ជាប់ប្រទេសកម្ពុជាទៅកាន់ពិភពលោកកាន់តែទូលំទូលាយ»។
លោកបាននិយាយទៀតថា អាកាសយានដ្ឋានអន្តរជាតិសៀមរាបអង្គរបច្ចុប្បន្នមានបុគ្គលិកសរុបចំនួន ៤៤៧ នាក់ ក្នុងនោះមានជនជាតិចិន ៨២ នាក់ និងជនជាតិខ្មែរចំនួន ៣៦៥ នាក់ ។លោក គិន ភា អគ្គនាយកវិទ្យាស្ថានទំនាក់ទំនងអន្តរជាតិកម្ពុជា បានគូសបញ្ជាក់ថា អាកាសយានដ្ឋានអន្តរជាតិសៀមរាបអង្គរគឺជាសមិទ្ធផលដ៏សំខាន់មួយនៅក្នុងឧស្សាហកម្មអាកាសចរណ៍របស់កម្ពុជា។លោកបានបន្តថា “វានឹងជួយសម្រួលដល់ដំណើរកម្សាន្តទៅតំបន់អង្គរ កែលម្អហេដ្ឋារចនាសម្ព័ន្ធ និងសម្រួលពាណិជ្ជកម្ម និងការវិនិយោគ” ។
លោកបានបន្ថែមថា អាកាសយានដ្ឋាននេះក៏ជួយលើកកម្ពស់ជីវភាពរស់នៅ បង្កើតការងារ សម្រួលដល់ការធ្វើដំណើរ និងដឹកជញ្ជូនទំនិញ ព្រមទាំងផ្តល់លទ្ធភាពទទួលបានការអប់រំ និងការថែទាំសុខភាពសម្រាប់ប្រជាជនដែលធ្វើឱ្យអាកាសយានដ្ឋានអន្តរជាតិសៀមរាបអង្គរក្លាយជានិមិត្តរូបនៃវឌ្ឍនភាពរបស់ប្រទេសក្នុងវិស័យអាកាសចរណ៍ និងទេសចរណ៍។
អាកាសយានដ្ឋានអន្តរជាតិសៀមរាបអង្គរ មានទីតាំងនៅស្រុកសូទ្រនិគម ចម្ងាយប្រហែល ៤០គីឡូម៉ែត្រពីឧទ្យានអង្គរ និងជាង ៥០គីឡូម៉ែត្រពីទីរួមខេត្តសៀមរាប៕
