របាយការណ៍របស់ក្រសួងទេសចរណ៍កម្ពុជា ចេញផ្សាយកាលពីពេលថ្មីៗនេះ បង្ហាញថា ប្រទេសកម្ពុជាបានទាក់ទាញភ្ញៀវទេសចរចិនចំនួន 498,250នាក់ ក្នុងអំឡុងពេល 11 ខែដំបូងនៃឆ្នាំ 2023 ។ របាយការណ៍បានបន្តថា ចំនួននេះមានចំនួន 10.1 ភាគរយ នៃចំនួនភ្ញៀវទេសចរអន្តរជាតិសរុប 4.91 លាននាក់មកកាន់ប្រទេសកម្ពុជា ក្នុងអំឡុងខែមករាដល់ ខែវិច្ឆិកា ឆ្នាំ2023 នេះ។
របាយការណ៍បានឱ្យដឹងថា ប្រទេសចិនគឺជាប្រភពទេសចរបរទេសធំជាងគេទី 3 មកកាន់កម្ពុជា បន្ទាប់ពីប្រទេសថៃ និងវៀតណាម ដោយបន្ថែមថា ជនជាតិថៃប្រហែល 1.65 លាននាក់ និង វៀតណាម 920.093 នាក់បានធ្វើដំណើរមកកាន់ប្រទេសកម្ពុជាក្នុងអំឡុងពេលដែលបានរៀបរាប់ខាងលើ។ ឯកឧត្តម តុប សុភ័គ្រ រដ្ឋលេខាធិការ និងជាអ្នកនាំពាក្យក្រសួងទេសចរណ៍ មានប្រសាសន៍ថា កម្ពុជាចង់ឃើញភ្ញៀវចិនមកកម្សាន្តកាន់តែច្រើន។
ឯកឧត្តម បានឱ្យដឹង ថា “យើងចង់បានភ្ញៀវទេសចរចិនកាន់តែច្រើន ដោយសារពួកគេបានចូលរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងទេសចរណ៍របស់យើង ក៏ដូចជាការកាត់បន្ថយភាពក្រីក្រ” ។ ឯកឧត្តម ជឿជាក់ថា អាកាសយានដ្ឋានអន្តរជាតិសៀមរាបអង្គរ ដែលវិនិយោគដោយចិន ដែលបានបើកដំណើរការជើងហោះហើរជាផ្លូវការកាលពីខែមុន នឹងទាក់ទាញអ្នកធ្វើដំណើរអន្តរជាតិមកកម្ពុជាកាន់តែច្រើន។ ឯកឧត្តម បន្តថា “យើងសង្ឃឹមថា ព្រលានយន្តហោះថ្មីនៅសៀមរាបនេះ នឹងទាក់ទាញក្រុមហ៊ុនអាកាសចរណ៍អន្តរជាតិថ្មីៗ ដូច្នេះពួកគេនឹងនាំភ្ញៀវទេសចរ និងអ្នកវិនិយោគកាន់តែច្រើនមកកាន់ប្រទេសកម្ពុជា ជាពិសេសទៅកាន់ខេត្តសៀមរាប ដែលជាទឹកដីនៃឧទ្យានបុរាណវិទ្យាអង្គរដ៏ល្បីល្បាញ” ។
គួរឱ្យដឹងថា វិស័យទេសចរណ៍គឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចរបស់ប្រទេសកម្ពុជា បន្ថែមពីលើការនាំចេញសម្លៀកបំពាក់ ស្បែកជើង និងការនាំចេញទំនិញ កសិកម្ម សំណង់ និងអចលនទ្រព្យ៕
