ក្រសួងឧស្សាហកម្ម និងព័ត៌មានវិទ្យារបស់ប្រទេសចិនទើបបានចេញសេចក្តីណែនាំស្តីពីការបង្កើតបន្ទះឈីបរថយន្ត ស្របតាមស្តង់ដារ។ នេះបើយោងតាមការចុះផ្សាយរបស់សារព័ត៍មានក្នុងស្រុក ប្រទេសចិន កាលពីពេលថ្មីៗកន្លងទៅ។
ការណែនាំនេះមានគោលបំណងជំរុញការអភិវឌ្ឍន៍ និងការអនុវត្តស្តង់ដារបន្ទះឈីបរថយន្ត និងជួយសម្រួលដល់ការស្រាវជ្រាវ ការអភិវឌ្ឍន៍ និងការអនុវត្តបន្ទះឈីបទាំងនេះ។ អាទិភាពនឹងត្រូវបានផ្តល់ទៅឱ្យការអភិវឌ្ឍន៍ស្តង់ដារដែលត្រូវការជាបន្ទាន់ ដែលជាមូលដ្ឋានគ្រឹះទូទៅ និងទាក់ទងនឹងផលិតផលសំខាន់ៗ យោងទៅតាមការណែនាំ។
នៅឆ្នាំ 2025 ប្រទេសចិន នឹងអភិវឌ្ឍស្តង់ដារសំខាន់ៗជាង 30 សម្រាប់បន្ទះឈីប រថយន្ត ដោយបញ្ជាក់ពីតម្រូវការមូលដ្ឋានទាក់ទងនឹងភាពអាចជឿជាក់បាន ក៏ដូចជាបរិស្ថាន ភាពស្របគ្នានៃអេឡិចត្រូម៉ាញ៉េទិច សុវត្ថិភាពមុខងារ និងសុវត្ថិភាពព័ត៌មាន។ នៅឆ្នាំ 2030 ស្ដង់ដារជាង 70 នឹងត្រូវបានបង្កើតឡើង ដើម្បីគាំទ្រយ៉ាងមានប្រសិទ្ធភាពដល់ការអភិវឌ្ឍន៍នៃបច្ចេកវិទ្យា និងផលិតផលបន្ទះឈីបរថយន្ត៕
