ប៉ុន្មានថ្ងៃបន្ទាប់ពីក្រុមហ៊ុនផលិតស្មាតហ្វូនរបស់ចិន Xiaomi បានចាប់ផ្តើមហក់ចូលទៅក្នុងវិស័យរថយន្តអគ្គិសនីដំបូងរបស់ខ្លួន (EV) អ្នកទិញត្រូវបានគេប្រាប់ថាពួកគេប្រហែលជាត្រូវរង់ចាំរហូតដល់ 6 ខែដើម្បីទទួលបាន រថយន្តដែលបានបញ្ជាទិញ។
ក្រុមហ៊ុន Xiaomi ពីមុនបាននិយាយថាការបញ្ជាទិញជាមុនបានកើនឡើងដល់ 88,898 គ្រឿង ក្នុងរយៈពេល 24 ម៉ោងបន្ទាប់ពីខ្លួនចាប់ផ្តើមទទួលការបញ្ជាទិញ។ ក្រុមហ៊ុនបច្ចេកវិទ្យាយក្សដែលជាអ្នកលក់ស្មាតហ្វូនធំជាងគេទីបីនៅលើពិភពលោកដែលមានចំណែកទីផ្សារប្រហែល 12% កំពុងដណ្តើមយកអតិថិជនពីគូប្រជែង EV រួមមាន Tesla និង BYD នៅក្នុងទីផ្សារដ៏ធំបំផុតរបស់ពិភពលោកសម្រាប់រថយន្ត។
ម៉ូដែល SU7 ស្តង់ដារមានតម្លៃ ប្រមាណជិត 29000 ដុល្លារអាមេរិក។ រថយន្តអគ្គិសនីរបស់ Xiaomi មួយនេះ ត្រូវបានគេប្រៀបធៀបជាមួយនឹងម៉ូដែល Taycan និង Panamera របស់ក្រុមហ៊ុន Porsche ដែលអាចបើកបរបាននៅក្នុងចម្ងាយអប្បបរមា 700 គីឡូម៉ែត្រ ដោយផ្តួលរថយន្ត Tesla Model 3 ដែលអាចបើកបរបាន ត្រឹមចម្ងាយ 567 គីឡូម៉ែត្រប៉ុណ្ណោះ។
ជាផ្នែកមួយនៃយុទ្ធនាការរបស់ខ្លួនក្នុងការផ្សព្វផ្សាយ SU7 ក្រុមហ៊ុន Xiaomi ក៏បានបញ្ចេញកំណែពិសេសនៃរថយន្តដែលមានឈ្មោះថា Founder’s Edition ដែលភ្ជាប់មកជាមួយកាដូ ឥតគិតថ្លៃ ដូចជាទូរទឹកកកជាដើម។
នាយកប្រតិបត្តិរបស់ក្រុមហ៊ុនបច្ចេកវិទ្យាយក្សចិនមួយនេះ គឺលោក Lei Jun បាននិយាយនៅក្នុងការបង្ហោះ Weibo ថាខ្លួននឹងបើកការលក់ជុំទីពីរសម្រាប់ Founder’s Edition ។ ក្រុមហ៊ុនសង្ឃឹមថាប្រព័ន្ធប្រតិបត្តិការរួមគ្នារបស់ SU7 ជាមួយទូរស័ព្ទ កុំព្យូទ័រយួរដៃ និងឧបករណ៍ផ្សេងទៀតនឹងទាក់ទាញអតិថិជនដែលកំពុងប្រើផលិតផលរបស់ Xiaomi ស្រាប់។
EVs របស់ក្រុមហ៊ុន Xiaomi ត្រូវបានផលិតដោយអង្គភាពនៃក្រុមហ៊ុនផលិតរថយន្តរបស់រដ្ឋ BAIC Group នៅរោងចក្រក្នុងទីក្រុងប៉េកាំង ដែលអាចផលិតរថយន្តបានរហូតដល់ 200,000 គ្រឿងក្នុងមួយឆ្នាំ។ ក្រុមហ៊ុនចិនមួយនេះ បាននិយាយថា ខ្លួននឹងវិនិយោគ 10 ពាន់លានដុល្លារ ក្នុងអាជីវកម្មរថយន្តរបស់ខ្លួនក្នុងរយៈពេល 10 ឆ្នាំខាងមុខ៕
