ក្រសួងសុខាភិបាលកម្ពុជាបាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ ទី 7 ខែមេសា ឆ្នាំ 2024 ថា ប្រទេសកម្ពុជាបានរកឃើញករណីជំងឺ អុតស្វា ចំនួនបីករណីបន្ថែមទៀត ដែលនាំឱ្យចំនួនអ្នកឆ្លងសរុបនៅក្នុងប្រទេសកើនឡើងដល់ 17 ករណី រហូតមកដល់ពេលនេះ។
ក្រសួងសុខាភិបាល បាននិយាយថា “ចាប់តាំងពីខែធ្នូឆ្នាំ 2023 រហូតមកដល់បច្ចុប្បន្នមនុស្សសរុបចំនួន 17 នាក់ត្រូវបានធ្វើតេស្តវិជ្ជមានសម្រាប់ជំងឺអុតស្វា។ ពួកគេទាំងអស់គឺជាបុរសដែលមានអាយុចន្លោះពី 20 ទៅ 43 ឆ្នាំ” ដោយបន្ថែមថាពួកគេស្ទើរតែទាំងអស់បានរស់នៅនិងធ្វើការនៅក្នុងរាជធានី ភ្នំពេញ។ ក្រសួងបានបញ្ជាក់ថា បច្ចុប្បន្ន អ្នកជំងឺអុតស្វា 5 នាក់កំពុងសម្រាកព្យាបាលនៅមន្ទីរពេទ្យ។
ក្រសួងសុខាភិបាល ក៏បានអំពាវនាវជាថ្មី ឱ្យប្រជាពលរដ្ឋមានការប្រុងប្រយ័ត្នបន្ថែមទៀត ដើម្បីការពារកុំឱ្យមានការចម្លងមេរោគ អុតស្វា ក្នុងទ្រង់ទ្រាយធំ។ មេរោគ អុតស្វា ត្រូវបានចម្លងពីមនុស្សទៅមនុស្សតាមរយៈគ្រប់ទម្រង់នៃទំនាក់ទំនងផ្លូវភេទជាមួយអ្នកដែលមានមេរោគ និងតាមរយៈការប៉ះពាល់ផ្ទាល់ជាមួយរបួស សារធាតុរាវក្នុងខ្លួន ទឹកមាត់ និងឧបករណ៍ដែលមានមេរោគ។
អ្នកដែលមានរោគសញ្ញាដូចជា កន្ទួលដែលមានពងបែកលើមុខ បាតដៃ ជើង រាងកាយ ភ្នែក មាត់ ឬប្រដាប់ភេទ ក្តៅខ្លួន ហើមកូនកណ្តុរ ឈឺក្បាល ឈឺសាច់ដុំ ឈឺខ្នងទាប និងអស់កម្លាំង គួរទៅមណ្ឌលសុខភាព ឬមន្ទីរពេទ្យដើម្បី ការពិគ្រោះយោបល់ ឬការធ្វើតេស្តរកមេរោគ អុតស្វា៕
