ម្ចាស់ក្រុមហ៊ុន Ford (RMA Group) លោក Kevin Whitcraft ជួប ឯកឧត្តម កែវ រតនៈ នៅគេហដ្ឋានខេត្តពោធិ៍សាត់ ដើម្បីពិភាក្សាអំពីការពង្រីកខ្សែសង្វាក់តំឡើងរថយន្ត Ford កែរថយន្តដឹកអ្នកដំណើរ Mercedes Sprinter Van សម្រាប់នាំចេញទៅទីផ្សារពិភពលោក និងការនាំក្រុមហ៊ុនដៃគូមកផលិតគ្រឿងបង្គុំរថយន្តនៅ ស្រុកក្រគរ។
FORD Division ត្រូវបានគេស្គាល់ថា Ford Cambodia គឺជាផ្នែកធំជាងគេមួយ ដែលដំណើរការដោយ RMA Cambodia ដែលជាសមាជិកនៃ RMA Group និងជាអ្នកដឹកនាំផ្នែកដំណោះស្រាយអាជីវកម្មសកល និងជាក្រុមហ៊ុនចម្រុះដែលផ្តល់ផលិតផល និងសេវាកម្មសំខាន់ៗដល់សេដ្ឋកិច្ចក្នុងការផ្លាស់ប្តូរ។ ក្រុមហ៊ុន អ អិម អេ ខេមបូឌា ទទួលបានកេរ្តិ៍ឈ្មោះដ៏មានឥទ្ធិពលក្នុងនាមជាអ្នកផ្តល់សេវាលក់រាយ និងដំណោះស្រាយរថយន្ត និងសម្រាប់សេវាកម្មនៅក្នុងប្រទេសកម្ពុជា ក្នុងនាមជាអ្នកចែកចាយផ្តាច់មុខ នៃម៉ាករថយន្តលំដាប់ពិភពលោករបស់ក្រុមហ៊ុន ហ្វដ ម៉ូទ័រ ចាប់តាំងពីឆ្នាំ 1997 និងមានបុគ្គលិកជាង 200 នាក់។
ចំណែកក្រុមហ៊ុន Ford Motor Company គឺជាក្រុមហ៊ុនផលិតរថយន្ត របស់អាមេរិក ដែលមានទីស្នាក់ការកណ្តាលនៅទីក្រុង Dearborn រដ្ឋ Michigan សហរដ្ឋអាមេរិក។ ក្រុមហ៊ុន Ford ត្រូវបានបង្កើតឡើងដោយលោក Henry Ford នៅថ្ងៃទី 16 ខែមិថុនា ឆ្នាំ 1903។ ក្រុមហ៊ុននេះលក់រថយន្ត និងរថយន្តពាណិជ្ជកម្មក្រោមម៉ាក Ford និងរថយន្តប្រណីតក្រោមម៉ាក Lincoln របស់ខ្លួន៕
