ត្រីនេះមានឈ្មោះពីរ នៅតូចហៅ «ត្រីច្រឡឹង» ពេលធំពេញវ័យកាលណាហៅថា «ត្រីព្រលូង» មានឈ្មោះវិទ្យាសាស្ត្រ (Leptobarbus rubripinna) មានប្រវែងដងខ្លួនដល់ប្រហែល ៥០ ស.ម។
ត្រីនេះរស់នៅក្នុងទីជម្រកដូចជា ទន្លេ ស្ទឹង និងតាមតំបន់វាលទំនាបលិចទឹក និងជាប្រភេទត្រីដែលមិនអាចរស់នៅក្នុងទឹកដែលពុំមានចរន្តចេញចូលបានឡើយ។ នៅក្នុងរវាងខែមករា និងកុម្ភៈ វាធ្វើចរាចរផ្លាស់ទីទៅក្នុងទន្លេមេគង្គលើ និងវិលត្រឡប់មកវិញក្នុងខែឧសភា ដល់ខែមិថុនា។ វាស៊ីសត្វល្អិត និងផ្លែរុក្ខជាតិជាច្រើនប្រភេទ បួករួមទាំងផ្លែរុក្ខជាតិមានជាតិពុលខ្ពស់ អាចធ្វើឲ្យពុលដល់មនុស្សដែលចាប់វាមកបរិភោគបាន។
«ត្រីច្រឡឹង» ឬ «ត្រីព្រលូង» ត្រូវបានក្រុមអ្នកវិទ្យាសាស្ត្រកត់ត្រាចូលក្នុងបញ្ជីក្រហម IUCN Red List Data deficient (DD) ក្នុងឆ្នាំ ២០១១ ជាប្រភេទត្រីដែលពុំមានទិន្នន័យ។
លក្ខណៈសម្គាល់ត្រីច្រឡឹង ឬត្រីព្រលូង គឺមានទ្រនង់ព្រុយខ្នងទន់មានចំនួន ៩ទ្រនង់។ ទ្រនង់ព្រុយគូទទន់មានចំនួន ៨ទ្រនង់។ ពេលនៅតូច មានឆ្នូតខ្មៅតាមខ្សែបណ្តោយដងខ្លួន។ ព្រុយពោះ ព្រុយគូទ និងព្រុយកន្ទុយពណ៌ក្រហម។ មានស្រកាធំៗ។
សូមចូលរួមអភិរក្សត្រីកម្រៗសម្រាប់មនុស្សរាប់ជំនាន់តទៅមុខទៀត។
