នៅថ្ងៃទី 31 ខែតុលា ឆ្នាំ 2023 បាត់ដំបង ក្លាយជាទីក្រុងដំបូងគេដែលមិនធ្លាប់មានរបស់កម្ពុជាដែលបានចូលក្នុងបញ្ជីទីក្រុងច្នៃប្រឌិតរបស់អង្គការយូណេស្កូ។ ភាពច្នៃប្រឌិតនៃម្ហូបអាហារ និង អាហាដ្ឋាននានា នៅក្រុងបាត់ដំបង គឺជាសក្ខីភាពមួយចំពោះកិច្ចខិតខំប្រឹងប្រែង និងការប្តេជ្ញាចិត្តយូរអង្វែងរបស់ខេត្តបាត់ដំបងក្នុងការទាញយកវប្បធម៌ និងភាពច្នៃប្រឌិតសម្រាប់ការអភិវឌ្ឍន៍ទីក្រុងប្រកបដោយនិរន្តរភាព។
នៅថ្ងៃទិវាទីក្រុងពិភពលោក ទីក្រុងចំនួន 55 បានចូលក្នុងបញ្ជីទីក្រុងច្នៃប្រឌិតរបស់អង្គការយូណេស្កូ (UCCN) បន្ទាប់ពីការចាត់តាំង ដោយអគ្គនាយកអង្គការយូណេស្កូ Audrey Azoulay ។ ទីក្រុងថ្មីៗ រួមទាំងបាត់ដំបងនៃប្រទេសកម្ពុជា ត្រូវបានទទួលស្គាល់ចំពោះការប្តេជ្ញាចិត្តយ៉ាងមុតមាំរបស់ក្រុង ក្នុងការទាញយកវប្បធម៌ និងភាពច្នៃប្រឌិតជាផ្នែកនៃយុទ្ធសាស្ត្រអភិវឌ្ឍន៍របស់ខ្លួន និងការបង្ហាញការអនុវត្តប្រកបដោយភាពច្នៃប្រឌិតក្នុងការរៀបចំផែនការទីក្រុង។
ការដាក់បញ្ចូលខេត្តបាត់ដំបងជា ទីក្រុងច្នៃប្រឌិតរបស់អង្គការយូណេស្កូក្នុងប្រភេទម្ហូបអាហារ មិនត្រឹមតែបង្ហាញពីមុខម្ហូបដ៏ពិសេសរបស់ខ្លួនប៉ុណ្ណោះទេ ប៉ុន្តែថែមទាំងមានឥទ្ធិពលលើវិស័យម្ហូបអាហារដើម្បីបង្កើនការអភិវឌ្ឍន៍ក្នុងស្រុក និងការផ្លាស់ប្តូរវប្បធម៌ពិភពលោកផងដែរ។ នៅឆ្នាំ២០២៣ អង្គការយូណេស្កូប្រចាំកម្ពុជា បានផ្តល់ជំនួយបច្ចេកទេសដល់រាជរដ្ឋាភិបាលកម្ពុជា និងសម្របសម្រួលសកម្មភាពកសាងសមត្ថភាពសម្រាប់ការផ្សព្វផ្សាយបណ្តាញទីក្រុងច្នៃប្រឌិតរបស់អង្គការយូណេស្កូ (UCCN) ដែលរៀបចំដោយសាលាក្រុងបាត់ដំបង រួមជាមួយក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ នៅបាត់ដំបង។
មុខម្ហូបក្នុងស្រុក រួមមាន ណែមបាត់ដំបង ប្រហុកបាត់ដំបង អាម៉ុកបាត់ដំបង ក្រឡាញ់បាត់ដំបង សង្វាក់បាត់ដំបង ល្ហុងបាត់ដំបង កន្ទួយហេសបាត់ដំបង អង្ករសំរូបបាត់ដំបង ទឹកក្រូច បាត់ដំបង គឺជាអាហារដែលពេញនិយមជាងគេ។ មុខម្ហូបទាំងនោះជាបេះដូងនៃជីវិតប្រចាំថ្ងៃរបស់ប្រជាជនក្នុងខេត្តបាត់ដំបង៕
