សម្បត្តិវប្បធម៌រូបីចំនួន 7 និងអរូបីចំនួន 3 របស់កម្ពុជា ត្រៀមដាក់បញ្ចូលក្នុងបញ្ជីបេតិកភណ្ឌពិភពលោក របស់អង្គការយូណេស្កូ។ ជាធម្មតាត្រូវចំណាយពេលជិតពីរឆ្នាំដើម្បីមានសម្បត្តិវប្បធម៌ មួយ អាចចុះបញ្ជីក្នុងបញ្ជីបេតិកភណ្ឌពិភពលោករបស់អង្គការយូណេស្កូ ហើយប្រទេសមួយអាចបញ្ចូលសម្បត្តិវប្បធម៌របស់ខ្លួន តែមួយគត់ទៅក្នុងបញ្ជីក្នុងមួយឆ្នាំ។
សម្បត្តិបេតិកភណ្ឌវប្បធម៌រូបីទាំង 7 ដែលកម្ពុជាត្រៀមនឹងស្នើសុំចុះក្នុងបញ្ជីរបស់អង្គការយូណេស្កូ រួមមាន អតីតគុក M-13 សារមន្ទីរប្រល័យពូជសាសន៍ទួលស្លែង និងមណ្ឌលប្រល័យពូជសាសន៍ជើងឯក ប្រាសាទបន្ទាយឆ្មារ រមណីយដ្ឋានអង្គរបូរី និងភ្នំដា រមណីយដ្ឋានប្រវត្តិសាស្ត្រភ្នំព្រះរាជទ្រព្យ ព្រះខ័នកំពង់ ប្រាសាទស្វាយ ប្រាសាទបេងមាលា និងរមណីយដ្ឋានប្រវត្តិសាស្ត្រភ្នំគូលែន។ ចំណែកសម្បត្តិវប្បធម៌អរូបី ទាំង 3 ដែលគ្រោងដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិគឺ ពិធីសង្ក្រាន្តខ្មែរ ក្រមាត្បាញប្រពៃណី និងប្រពៃណីអាពាហ៍ពិពាហ៍ខ្មែរ។
កាលពីពេលថ្មីៗនេះ កម្ពុជានឹងដាក់ឯកសារដើម្បីចុះឈ្មោះពិធីបុណ្យសង្ក្រាន្តកម្ពុជាក្នុងបញ្ជីបេតិកភណ្ឌអរូបីរបស់អង្គការយូណេស្កូនៅឆ្នាំ២០២៥ ហើយរំពឹងថានឹងចូលក្នុងបញ្ជី ជាផ្លូវការនៅឆ្នាំ២០២៦។ គួរបញ្ជាក់ថា កម្ពុជា មានសម្បត្តិវប្បធម៌រូបីចំនួន 4 និងបេតិកភណ្ឌវប្បធម៌អរូបី ចំនួន 6 ដែលបានចុះក្នុងបញ្ជីបេតិកភណ្ឌពិភពលោករបស់អង្គការ យូណេស្កូ។ សម្បត្តិវប្បធម៌រូបីដែលបានចុះបញ្ជីរួមមាន ឧទ្យានបុរាណវិទ្យាអង្គរ ប្រាសាទព្រះវិហារ តំបន់ប្រាសាទសំបូរព្រៃគុក និងតំបន់បុរាណវិទ្យាកោះកេរ្តិ៍។ ខណៈដែលបេតិកភណ្ឌវប្បធម៌អរូបីដែលបានចុះបញ្ជី គឺរបាំព្រះរាជទ្រព្យ ល្ខោនស្បែកធំ ល្បែងទាញព្រ័ត្រ ចាប៉ីដងវែង ល្ខោនខោល វត្តស្វាយអណ្តែត និងក្បាច់គុនបុរាណគុនល្បុក្កតោ៕
