តម្លៃទីផ្សារភាគហ៊ុនរបស់ក្រុមហ៊ុន VinFast ដែលជាក្រុមហ៊ុនផលិតរថយន្តអគ្គិសនីរបស់វៀតណាម (EV) បានកើនឡើងខ្ពស់ជាងក្រុមហ៊ុន Ford និង General Motors (GM) នៅថ្ងៃដំបូងនៃការជួញដូររបស់ខ្លួន។ ភាគហ៊ុននៅក្នុងក្រុមហ៊ុនដែលមិនទាន់ទទួលបានប្រាក់ចំណេញបានកើនឡើង 255% នៅក្នុងការបង្ហាញខ្លួនលើកដំបូងរបស់ពួកគេនៅលើ Nasdaq នៃទីក្រុងញូវយ៉ក។
នេះបានផ្តល់ឱ្យ VinFast នូវតម្លៃទីផ្សារភាគហ៊ុនចំនួន 85ពាន់លានដុល្លារ ខ្ពស់ជាងភាគហ៊ុន របស់ក្រុមហ៊ុន Ford ដែលមាន 48ពាន់លានដុល្លារ និងភាគហ៊ុនរបស់ GM ដែលមាន 46ពាន់លានដុល្លារ។ វាកើតឡើងនៅពេលដែលក្រុមហ៊ុនយក្សនៃឧស្សាហកម្មយានយន្ត និងក្រុមហ៊ុនផលិតថ្មីៗប្រយុទ្ធដើម្បីចំណែកទីផ្សាររថយន្តអគ្គិសនី EV ដែលកំពុងរីកចម្រើន។
ការចុះបញ្ជីនេះបានបន្ថែមប្រាក់ប្រមាណ 39 ពាន់លានដុល្លារដល់ទ្រព្យសម្បត្តិរបស់ប្រធាន និងស្ថាបនិកក្រុមហ៊ុន VinFast លោក Pham Nhat Vuong ដែលជាមហាសេដ្ឋីមានបំផុតរបស់វៀតណាមរួចទៅហើយ។ ឯកសារបទប្បញ្ញត្តិបង្ហាញថាលោកគ្រប់គ្រង 99% នៃភាគហ៊ុន របស់ក្រុមហ៊ុន ដែលភាគច្រើនតាមរយៈក្រុមហ៊ុនធំជាងគេរបស់វៀតណាមគឺ Vingroup JSC ។
លោក Bill Russo ស្ថាបនិក និងជានាយកប្រតិបត្តិនៃក្រុមហ៊ុន Automobility ដែលមានមូលដ្ឋាននៅទីក្រុងសៀងហៃបាននិយាយថា “វិនិយោគិនកំពុងបន្តជឿថាអនាគតគឺរថយន្តអគ្គិសនី ហើយថាប្រទេសអាស៊ីបូព៌ាដែលលក់ឡានមានតម្លៃទាបនឹងលេចចេញជាដៃគូប្រកួតប្រជែងនៅសហរដ្ឋអាមេរិក” ។ លោក Russo បាននិយាយថា VinFast អាចមានភាពខុសគ្នាដោយសារតែ “ពួកគេត្រូវបានគាំទ្រជាចម្បងដោយ Vingroup ដែលផ្តល់ឱ្យពួកគេនូវលទ្ធភាពទទួលបានមូលនិធិពីអាជីវកម្មដែលមានកំណត់ត្រានៃការរីកចម្រើន ” ។
លោកបានបន្តថា “ការចាប់ផ្តើមអាជីវកម្មផលិតរថយន្តអគ្គិសនី EV ភាគច្រើនបរាជ័យដោយសារតែពួកគេមិនមានប្រាក់ចំណេញស្នូល ហើយមូលនិធិពីខាងក្រៅនៅទីបំផុតនឹងអស់នៅពេលដែលពួកគេប្រើដើមទុនលឿនជាង ពួកគេបង្កើតសាច់ប្រាក់ចំណេញ” ។ ប៉ុន្តែ VinFast ក៏ប្រឈមមុខនឹងការប្រកួតប្រជែងដ៏ស្វិតស្វាញផងដែរ នៅពេលដែលក្រុមហ៊ុនផលិតឡានធំៗប្រយុទ្ធដើម្បីដណ្តើមទីផ្សារ។
នៅក្នុងឆមាសទីមួយនៃឆ្នាំ 2023នេះ VinFast បានចែកចាយរថយន្តអគ្គិសនី EVs ចំនួន 11,300 គ្រឿង។ នេះបើយោងតាមការបង្ហាញរបស់ក្រុមហ៊ុន។ បើប្រៀបធៀប Tesla បានចែកចាយរថយន្តជាង 889,000 គ្រឿងក្នុងរយៈពេលដូចគ្នា។
គួរឱ្យដឹងថា ក្រុមហ៊ុន VinFast បានចាប់ផ្តើមសាងសង់រោងចក្រតម្លៃ 4 ពាន់លានដុល្លារ ដែលមានទីតាំងនៅក្នុងរដ្ឋ North Carolina សហរដ្ឋអាមេរិក៕
