ភាគហ៊ុននៅក្នុងក្រុមហ៊ុន Apple បានធ្លាក់ចុះរយៈពេលពីរថ្ងៃជាប់ៗគ្នា បន្ទាប់ពីមានសេចក្តីរាយការណ៍ថា មន្រ្តីនៅក្នុងជួររដ្ឋាភិបាលចិនត្រូវបានហាមឃាត់មិនឱ្យប្រើប្រាស់ iPhone ។
ការវាយតម្លៃទីផ្សារភាគហ៊ុនរបស់ក្រុមហ៊ុនបានធ្លាក់ចុះជាង 6 ភាគរយ ឬជិត 200ពាន់លានដុល្លារ ក្នុងរយៈពេលពីរថ្ងៃចុងក្រោយនេះ។ ប្រទេសចិនគឺជាទីផ្សារដ៏ធំបំផុតទីបី របស់ក្រុមហ៊ុន បច្ចេកវិទ្យាយក្សអាមេរិក Apple ដែលមានចំនួន 18ភាគរយ នៃប្រាក់ចំណូលសរុបរបស់ខ្លួនកាលពីឆ្នាំមុន។ វាក៏ជាកន្លែងដែលផលិតផលភាគច្រើនរបស់ Apple ត្រូវបានផលិតដោយអ្នកផ្គត់ផ្គង់ធំបំផុតរបស់ខ្លួនគឺក្រុមហ៊ុន Foxconn ។
ចិន បានដាក់ចេញបទបញ្ជាឱ្យមន្ត្រីទីភ្នាក់ងារកណ្តាលរបស់រដ្ឋាភិបាលខ្លួន មិនឱ្យនាំយកទូរស័ព្ទ iPhone ចូលក្នុងការិយាល័យ ឬប្រើប្រាស់វាសម្រាប់ការងារឡើយ។ យ៉ាងណាមិញ មិនទាន់មានសេចក្តីថ្លែងការណ៍ផ្លូវការណាមួយពីរដ្ឋាភិបាលចិនជាការឆ្លើយតបនឹងរបាយការណ៍នេះទេ។
Apple មានតម្លៃទីផ្សារភាគហ៊ុនខ្ពស់បំផុតរបស់ពិភពលោកឈរនៅជិត ២,៨ ពាន់ពាន់លានដុល្លារ។ ភាគហ៊ុននៅក្នុងក្រុមហ៊ុនផ្គត់ផ្គង់មួយចំនួនរបស់ Apple ក៏ធ្លាក់ចុះផងដែរ។ តួយ៉ាងមានដូចជា ក្រុមហ៊ុន Qualcomm ដែលជាក្រុមហ៊ុនផ្គត់ផ្គង់បន្ទះឈីបស្មាតហ្វូនធំបំផុតរបស់ពិភពលោកបានធ្លាក់ចុះជាង 7% កាលពីថ្ងៃព្រហស្បតិ៍។ ចំណែកភាគហ៊ុននៅក្នុងក្រុមហ៊ុន SK Hynix របស់កូរ៉េខាងត្បូងបានធ្លាក់ចុះប្រហែល 4% កាលពីថ្ងៃសុក្រ។
របាយការណ៍នេះបានកើតឡើងខណៈភាពតានតឹងរវាងក្រុងវ៉ាស៊ីនតោននិងក្រុងប៉េកាំងនៅតែមានកម្រិតខ្ពស់។ ទីក្រុងប៉េកាំងក៏ត្រូវបានគេរាយការណ៍ថាកំពុងរៀបចំកញ្ចប់ថវិកា វិនិយោគថ្មី 40ពាន់លានដុល្លារ ដើម្បីជំរុញឧស្សាហកម្មផលិតបន្ទះឈីបរបស់ខ្លួន។ ដោយឡែក កាលពីសប្តាហ៍មុន ក្នុងអំឡុងពេលទស្សនកិច្ចរបស់រដ្ឋមន្ត្រីក្រសួងពាណិជ្ជកម្មអាមេរិក Gina Raimondo ទៅកាន់ទីក្រុងប៉េកាំង ក្រុមហ៊ុនបច្ចេកវិទ្យាយក្សរបស់ចិន Huawei បានបង្ហាញស្មាតហ្វូនជំនាន់ថ្មី Mate 60 Pro របស់ខ្លួន ដោយមិននឹកស្មានដល់៕
