ប្រទេសចិនកំពុងស្នើសុំវិធានការថ្មី ដើម្បីទប់ស្កាត់រយៈពេលដែលកុមារ និងក្មេងជំទង់អាចចំណាយពេលលេងទូរស័ព្ទរបស់ពួកគេ ដោយសារប្រទេសនេះមានគោលបំណងកាត់បន្ថយលើការញៀនអ៊ីនធឺណិត ហើយព្យាយាមបណ្តុះ “សីលធម៌ល្អ” និង “តម្លៃសង្គមនិយម” ក្នុងចំណោមអនីតិជន។
សំណើដែលចេញផ្សាយដោយ Cyberspace Administration នៃប្រទេសចិន ដែលជានិយតករអ៊ីនធឺណិតកំពូលរបស់ប្រទេសកាលពីពេលថ្មីៗនេះ នឹងតម្រូវឱ្យឧបករណ៍ទូរស័ព្ទចល័ត កម្មវិធី App និង App Store ទាំងអស់ដាក់កម្រិតម៉ោងអេក្រង់ប្រចាំថ្ងៃដល់អតិបរមាពីរម៉ោង ក្នុងមួយ ថ្ងៃអាស្រ័យលើក្រុមអាយុរបស់អ្នកប្រើ។
ការរឹតបន្តឹងនេះ ប្រសិនបើត្រូវបានអនុម័ត នោះនឹងកត់សម្គាល់ការពង្រីកវិធានការដែលមានស្រាប់ដែលត្រូវបានដាក់ចេញក្នុងប៉ុន្មានឆ្នាំថ្មីៗនេះ ដោយសារទីក្រុងប៉េកាំងមានគោលបំណងកំណត់ម៉ោងប្រើទូរស័ព្ទក្នុងចំនោមកុមារ និងកាត់បន្ថយការបង្ហាញរបស់ពួកគេចំពោះ “ព័ត៌មានដែលមិនចង់បាន”។
នៅក្រោមច្បាប់ព្រាងនេះ ដែលបើកសម្រាប់ការពិភាក្សាជាសាធារណៈរហូតដល់ថ្ងៃទី 2 ខែកញ្ញា កុមារ និងមនុស្សវ័យជំទង់ដែលប្រើឧបករណ៍ក្នុងទម្រង់អនីតិជននឹងឃើញកម្មវិធីអនឡាញបិទដោយស្វ័យប្រវត្តិ នៅពេលដែលដល់ពេលវេលាកំណត់រៀងៗខ្លួន។ ពួកគេក៏នឹងត្រូវបានផ្តល់ជូន “មាតិកាផ្អែកលើអាយុ” ផងដែរ។
កុមារដែលមានអាយុក្រោម 8 ឆ្នាំនឹងអាចប្រើទូរស័ព្ទរបស់ពួកគេបានត្រឹមតែ 40 នាទីក្នុងមួយថ្ងៃប៉ុណ្ណោះ ខណៈដែលក្មេងដែលមានអាយុពី 8 ទៅ 16 ឆ្នាំនឹងទទួលបានម៉ោងលេងទូរស័ព្ទ រយៈពេលមួយម៉ោង។ ក្មេងជំទង់ដែលមានអាយុលើសពី 16 ឆ្នាំនិងអាយុក្រោម 18 ឆ្នាំនឹងត្រូវបានអនុញ្ញាតពីរម៉ោង។
ក្រុមគ្រប់ប្រភេទអាយុទាំងអស់ នឹងទទួលបានការរំលឹកឱ្យសម្រាកបន្ទាប់ពីប្រើឧបករណ៍របស់ពួកគេលើសពី 30 នាទី៕
