ក្រុមហ៊ុនរថយន្តចិន Great Wall Motor (GWM) កំពុងអង្រួនឧស្សាហកម្មរថយន្តនៅក្នុងប្រទេសថៃ ដោយដាក់បង្ហាញរថយន្តស៊េរីថ្មីរបស់ខ្លួន ម៉ូដែលTank 300 និង 500 series ជាផ្លូវការនៅទីក្រុងបាងកក កាលពីពេលថ្មីៗនេះ។
រថយន្ត All New Tank 500 HEV ដែលជាប្រភេទរថយន្តស្ព័រប្រភេទ Off-Road (SUV) មានតម្លៃ 2,049,000 បាត (55,880 ដុល្លារ) និងម៉ូដែលUltra មានតម្លៃ 2,269,000 បាត ខណៈ The All New Tank 300 HEV ដែលរចនាឡើងសម្រាប់របៀបរស់នៅបែបផ្សងព្រេងមានតម្លៃចន្លោះពី1,649,000 បាត ទៅ 1,799,000 បាត។ ក្រមហ៊ុន GWM នឹងចាប់ផ្ដើមផ្ដល់ជូន រថយន្តម៉ូដែលទាំងពីរនេះទៅកាន់អតិថិជន ចាប់ពីខែតុលា តទៅ។
“យើងបានប្រើប្រាស់បច្ចេកវិទ្យា off-road ទំនើបបំផុតដោយផ្អែកលើ TANK និង Hi4-T នៅក្នុងរថយន្តថ្មីទាំងនេះ។ គោលដៅរបស់យើងគឺដើម្បីបង្កើតរបៀបបើកបរ off-road ដែលកំណត់ដោយសមត្ថភាព ថាមពល និងភាពងាយស្រួល”។ នេះបើតាមការលើកឡើងរបស់ លោក Vudhigorn Suriyachantananont អនុប្រធានផ្នែកទីផ្សាររបស់ ក្រុមហ៊ុន GWM ប្រចាំតំបន់អាស៊ាន។ លោក បន្តថា “រថយន្តម៉ូដែល Tank ទទួលបានភាពជោគជ័យយ៉ាងខ្លាំងនៅក្នុងប្រទេសចិន និងទូទាំងពិភពលោក ដោយការលក់រថយន្តប្រភេទ Tank កើនឡើងលើសពី 300,000 គ្រឿងនៅទូទាំងពិភពលោក និងច្រើនជាង 60 ភាគរយនៃទីផ្សារ off-road របស់ប្រទេសចិន” ។
