ប្រធានាធិបតីចិន លោក Xi Jinping នៅថ្ងៃទី២១ ខែ វិច្ឆិកា ឆ្នាំ ២០២៣នេះ បានអំពាវនាវឱ្យមានការដោះលែងអ្នកជាប់ឃុំដែលជាជនស៊ីវិល និងបទឈប់បាញ់ជាបន្ទាន់ក្នុងសង្គ្រាមរវាងអ៊ីស្រាអែល និងក្រុមហាម៉ាស។ លោក Xi ថ្លែងបែបនេះ នៅក្នុងកិច្ចប្រជុំកំពូល នៃមេដឹកនាំក្រុមប្រទេស BRICS តាមប្រព័ន្ធវីដេអូខល។
លោក Xi បាននិយាយថា “ភាគីទាំងអស់នៅក្នុងជម្លោះគួរតែបញ្ឈប់ជាបន្ទាន់នូវការបាញ់ប្រហារ បញ្ឈប់រាល់អំពើហិង្សា ការវាយប្រហារដែលមានគោលដៅលើជនស៊ីវិល និងដោះលែងអ្នកជាប់ឃុំដែលជាជនស៊ីវិល ដើម្បីជៀសវាងការបាត់បង់ជីវិត និងការឈឺចាប់កាន់តែច្រើន”។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋចិន Xinhua ។
ប្រធានាធិបតីចិនរូបនេះ ក៏បានអំពាវនាវឱ្យមាន “ការចរចារ សន្តិភាពអន្តរជាតិ”ដើម្បីដោះស្រាយជម្លោះរវាងអ៊ីស្រាអែល និងក្រុមហាម៉ាស។ លោក Xi បានសង្កត់ធ្ងន់ថា មិនអាចមានសន្តិភាព និងសន្តិសុខប្រកបដោយនិរន្តរភាពនៅមជ្ឈិមបូព៌ាដោយគ្មានដំណោះស្រាយត្រឹមត្រូវចំពោះអ្វីដែលប៉ាឡេស្ទីន ស្នើចង់បាននោះទេ។ លោកបានបន្តថា ប្រទេសចិនអំពាវនាវឲ្យមានការកោះប្រជុំសន្និសិទសន្តិភាពអន្តរជាតិមួយដែលមានសិទ្ធិអំណាចជាងនេះក្នុងការកសាងការឯកភាពអន្តរជាតិសម្រាប់សន្តិភាព។
សន្និសីទបែបនេះ លោក Xi បានបន្ថែមថា “ធ្វើការឆ្ពោះទៅរកដំណោះស្រាយដំបូងចំពោះសំណួររបស់ប៉ាឡេស្ទីន ដែលមានលក្ខណៈទូលំទូលាយ យុត្តិធម៌ និងនិរន្តរភាព”។ មេដឹកនាំចិនរូបនេះ បានគូសបញ្ជាក់ថា ចាប់តាំងពីការផ្ទុះឡើងនៃជម្លោះប៉ាឡេស្ទីន-អ៊ីស្រាអែល ចុងក្រោយនេះ ប្រទេសចិនបាននិងកំពុងធ្វើការយ៉ាងសកម្មដើម្បីលើកកម្ពស់កិច្ចចរចាសន្តិភាព និងបទឈប់បាញ់។
គួររំលឹកថា ទីក្រុងប៉េកាំងបានផ្តល់ជំនួយមនុស្សធម៌ ដើម្បីជួយសម្រាលស្ថានការណ៍មនុស្សធម៌នៅហ្គាហ្សា ហើយនឹងកំពុងបន្តធ្វើដូច្នេះ មកដល់ពេលបច្ចុប្បន្ន៕
