ទីក្រុងឌូបៃ កំពុងដាក់ឱ្យដំណើរការជុំទីមួយនៃរថយន្តតាក់សុីរ៉ូបូត ដែលគ្មានមនុស្សបើក នៅខែក្រោយ ដែលជាផ្នែកមួយនៃផែនការមួយដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍។
តាក់ស៊ីអគ្គិសនីបើកបរដោយស្វ័យប្រវត្តិ ចំនួន 5 គ្រឿង ដែលដំណើរការដោយក្រុមហ៊ុនបុត្រសម្ព័ន្ធរបស់ General Motors នឹងចាប់ផ្តើមសាកល្បងបើកបរលើផ្លូវប្រវែង 8 គីឡូម៉ែត្រ នៅក្នុងសង្កាត់ Jumeirah ដ៏ធំនៃទីក្រុងអារ៉ាប់រួម។ នេះបើយោងតាមការបញ្ជាក់ពីលោក Ahmed Bahrozyan នាយកប្រតិបត្តិ សាធារណការ របស់ទីក្រុងឌូបៃ និង អាជ្ញាធរដឹកជញ្ជូន (RTA)។
លោក Bahrozyan បាននិយាយថា ឌូបៃសង្ឃឹមថានឹងក្លាយជាទីក្រុងមជ្ឈិមបូព៌ាដំបូងគេដែលដាក់ឱ្យប្រើប្រាស់ តាក់ស៊ីគ្មានអ្នកបើកបរ។ តាក់ស៊ីស្វ័យប្រវត្តិ បច្ចុប្បន្នដំណើរការនៅក្នុងទីក្រុងជាច្រើនជុំវិញពិភពលោក ដែលភាគច្រើននៅសហរដ្ឋអាមេរិក និងប្រទេសចិន។ លោក Bahrozyan បាននិយាយនៅក្នុងបទសម្ភាសន៍ជាមួយ CNN ថា “យើងកំពុងធ្វើការធ្វើតេស្ត និងការសាកល្បងផ្ទាល់ខ្លួនរបស់យើងនៅក្នុងទីក្រុងឌូបៃ… គ្រប់ទីក្រុងទាំងអស់មានលក្ខណៈផ្ទាល់ខ្លួនរបស់វា” ។ យើងមានលក្ខខណ្ឌអាកាសធាតុដែលខុសពីសហរដ្ឋអាមេរិក”។
RTA គ្រោងនឹងបញ្ចេញរថយន្តតាក់ស៊ីបើកបរដោយខ្លួនឯងចំនួន 4,000 គ្រឿងនៅឆ្នាំ 2030 ដោយបន្ថែមទៅលើរថយន្តតាក់ស៊ីធម្មតា ចំនួន 12,000 គ្រឿងនៅក្នុងទីក្រុង។ ការជិះត្រូវបានគេរំពឹងថានឹងមានតម្លៃថ្លៃជាងតាក់ស៊ីធម្មតាបន្តិច ប៉ុន្តែនៅក្នុងតម្លៃប្រហែលគ្នាទៅនឹងរថយន្តឯកជនដូចជា Uber ជាដើម៕
