គេហទំព័រ Financial Times បានរាយការណ៍កាលពីថ្ងៃអង្គារថា Meta Platforms កំពុងរៀបចំដាក់ឱ្យដំណើរការនូវកម្មវិធីជជែកកំសាន្តដែលដំណើរការដោយបញ្ញាសិប្បនិម្មិត (AI) ដែលបង្ហាញពីបុគ្គលិកលក្ខណៈផ្សេងៗគ្នាឱ្យបានឆាប់ នៅអំឡុងខែកញ្ញា ឆ្នាំ២០២៣ខាងមុខនេះ។
Meta បាននឹងកំពុងរចនាគំរូសម្រាប់ chatbots ដែលអាចមានការពិភាក្សាដូចមនុស្សជាមួយនឹងអ្នកប្រើប្រាស់របស់ខ្លួន ខណៈដែលក្រុមហ៊ុនព្យាយាមជំរុញការចូលរួមរបស់ខ្លួនជាមួយនឹងវេទិកាប្រព័ន្ធផ្សព្វផ្សាយសង្គម។ នេះបើយោងតាមរបាយការណ៍ដែលបានលើកឡើងពីអ្នកជំនាញ ដែលដឹងអំពីផែនការនេះ។
របាយការណ៍នេះកើតឡើងនៅពេលដែលនាយកប្រតិបត្តិ Meta កំពុងផ្តោតលើការជំរុញការរក្សាទុកអ្នកប្រើប្រាស់នៅលើកម្មវិធី Threads ថ្មីដែលមានមូលដ្ឋានលើការបង្ហោះជាអក្សរ បន្ទាប់ពីកម្មវិធីនេះបានបាត់បង់អ្នកប្រើប្រាស់ជាងពាក់កណ្តាលក្នុងរយៈពេលប៉ុន្មានសប្តាហ៍បន្ទាប់ពីការចាប់ផ្តើមរបស់ខ្លួនកាលពីថ្ងៃទី ៥ ខែកក្កដា ឆ្នាំ២០២៣។
មេ Facebook បានរាយការណ៍ពីការកើនឡើងយ៉ាងខ្លាំងនៃប្រាក់ចំណូលពីការផ្សាយពាណិជ្ជកម្មនៅក្នុងប្រាក់ចំណូលសរុបរបស់ខ្លួនកាលពីសប្តាហ៍មុន ដោយព្យាករណ៍ថាប្រាក់ចំណូលនៅត្រីមាសទី ៣ នឹងកើនលើសពីការរំពឹងទុករបស់ទីផ្សារ។
ក្រុមហ៊ុនបាននិងកំពុងងើបឡើងវិញពីភាពជូរចត់នៅឆ្នាំ ២០២២ ដែលត្រូវបានជំរុញដោយការបំផុសគំនិតជុំវិញបច្ចេកវិទ្យា AI ដែលកំពុងលេចធ្លោ។ Meta បានចាប់ផ្តើមកំណែថ្មីនៃគំរូបញ្ញាសិប្បនិមិត្ត របស់ខ្លួននៅក្នុងខែកក្កដាដែលហៅថា Llama 2 សម្រាប់ការប្រើប្រាស់ក្នុងគោលដៅពាណិជ្ជកម្ម ដែលនឹងត្រូវបានចែកចាយដោយ Microsoft តាមរយៈសេវាកម្ម Cloud Azure របស់ខ្លួន ហើយនឹងដំណើរការលើប្រព័ន្ធប្រតិបត្តិការ Windows ។
សារព័ត៌មាន Bloomberg បានរាយការណ៍កាលពីខែកក្កដា ថា Apple កំពុងធ្វើការលើការផ្តល់ AI ស្រដៀងទៅនឹង OpenAI’s ChatGPT និង Bard របស់ Google ដោយបន្ថែមថាខ្លួនបានបង្កើតក្របខ័ណ្ឌរបស់ខ្លួនដែលត្រូវបានគេស្គាល់ថា ‘Ajax’ ដើម្បីបង្កើតគំរូភាសាធំៗ និងកំពុងសាកល្បង chatbot ដែលវិស្វករ software ខ្លះហៅថា ‘Apple GPT’ ៕
