ឯកឧត្តម នេត្រ ភក្ត្រា រដ្ឋមន្រ្ដីក្រសួងព័ត៌មានបានស្នើឱ្យបងប្អូនប្រជាពលរដ្ឋទទួលស្គាល់សមត្ថភាព និងទេពកោសល្យរបស់ជនមានពិការភាព ដោយគ្មានការរើសអើងគ្រប់ទម្រង់ចំពោះអ្នកដែលមានពិការភាព ដោយចាត់ទុកបងប្អូនដែលមានពិការភាព ជាធនធានមនុស្សរបស់សង្គមយើង ចូលរួមជា មួយគ្នាក្នុងការអភិវឌ្ឍប្រទេសជាតិឱ្យកាន់តែរីកចម្រើនបន្តទៅមុខទៀត។ ការស្នើសុំរបស់រដ្ឋមន្រ្តីក្រសួងព័ត៌មានបែបនេះ ក្នុងពិធីប្រគល់វិញ្ញាបនបត្របញ្ជាក់ការសិក្សាផ្នែកអាន សរសេរព័ត៌មាន និងចម្រៀងសម័យ ដល់បុគ្គលិក ជនមានពិការភាពភ្នែក និងកាយសម្បទា នាព្រឹកថ្ងៃទី១៩ ខែមីនា ឆ្នាំ២០២៤ នៅមជ្ឈមណ្ឌលបណ្តុះបណ្តាលវិជ្ជាជីវៈពិការភ្នែក និងសមាគមតន្ត្រីសំនៀងជនពិការ ស្ថិតនៅភូមិជុំរៅ សង្កាត់គោករកា ខណ្ឌព្រែកព្នៅ រាជធានីភ្នំពេញ ។
ឯកឧត្ដម នេត្រ ភក្រ្ដា បានថ្លែងថា ជនមានពិការភាពគ្រប់ៗរូប ក៏មានសិទ្ធិទទួលបាននូវការស្រឡាញ់ រាប់អាន មានឱកាសចូលរួមរាល់សកម្មភាពនានាក្នុងសង្គមស្មើៗគ្នា និងទទួលបាននូវការផ្តល់តម្លៃពេញលេញ ហើយទាំងនេះជាចំណែកនៃកោសិកាសង្គមដែល មិនអាចខ្វះបាន។ ឯកឧត្តមរដ្ឋមន្ត្រី បានថ្លែងការអរគុណដល់សមាគមតន្ត្រីសំនៀងជនពិការ ដែលបានរៀបចំវគ្គបណ្តុះបណ្តាល ការអាន សរសេរព័ត៌មាន និងចម្រៀងសម័យ ដើម្បីលើកកម្ពស់សមត្ថភាពជនមានពិការភាព ភ្នែក និងកាយសម្បទា។ ឯកឧត្តមបានចាត់ទុកវគ្គបណ្តុះបណ្តាលនេះធ្វើឡើងក្នុងគោលបំណងដើម្បីពង្រឹងសមត្ថភាព បុគ្គលិក សមាជិក សមាជិកា ជនមានពិការភាពភ្នែក និងកាយសម្បទា ឱ្យមានជំនាញវិជ្ជាជីវៈច្បាស់លាស់ ដើម្បីឱ្យមានលទ្ធភាព និងឱកាសក្នុងការស្វែងរកការងារនៅតាមស្ថានីយវិទ្យុ ទូរទស្សន៍រដ្ឋ និងឯកជន ភោជនីយដ្ឋាន ក្លឹបកម្សាន្ត រង្គសាល រមណីយដ្ឋាន ការប្រគំតន្រ្ដី និងតាមតំបន់ទេសចរណ៍នានា។
ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសមាគមតន្ត្រីសំនៀងជនពិការបានជម្រាបជូនថា សមាគមបានបង្កើតឡើងតាមរយៈការដឹកនាំរបស់ លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី ដោយមានជនពិការភ្នែក ១ក្រុម ចំនួន ១៥នាក់ រួមជាមួយឯកឧត្តម ចាប តូ ហើយរហូតមកដល់បច្ចុប្បន្ន សមាគមមាន សមាជិកសរុបចំនួន ៧០០នាក់ ស្រី ២៩៧នាក់ ខ្លះមានមុខរបរម៉ាស្សា ចម្រៀង កាន់ឧបករណ៍តន្ត្រី សម័យ បុរាណ មន្ត្រីរាជការ សិស្ស-និស្សិត។ ឯកឧត្ដមបានបន្ដថា កន្លងមកនេះ សមាគមបានដឹកនាំកីឡាករ កីឡាការិនី ចំនួន ១៨នាក់ ចូលរួមការប្រកួត អាស៊ានប៉ារ៉ាហ្គេម លើកទី១២ ក្នុងនោះជន មានពិការភាពទទួលបានមេដាយសរុបចំនួន ១២គ្រឿង (មាស០១គ្រឿង, ប្រាក់៣គ្រឿង និង សំរឹទ្ធ ០៨គ្រឿង) ។
ឯកឧត្ដមអនុរដ្ឋលេខាធិការ និងជាប្រធានសមាគមតន្ត្រីសំនៀងជនពិការបានដឹងទៀតថា ឆ្នាំ២០២៣ ក្នុងក្រសួងស្ថាប័នរដ្ឋចំនួន៣៩ មានជនមានពិការភាពចូលបម្រើការងារចំនួន ៣ ៧៧៦ នាក់ ក្នុងនោះ ស្រី ៨៦៩ នាក់ ។ ចំពោះវិស័យឯកជនចំនួន ២៤១ស្ថាប័ន មានជនមានពិការភាពចូលបម្រើការងារ ចំនួន ៣ ៧៥៩ នាក់ (ស្រី ២ ៦៣១ នាក់)។ ឯកឧត្ដមបានបន្ថែមថា សរុបទាំងស្ថាប័នរដ្ឋ និងវិស័យឯកជនទូទាំងប្រទេសមានចំនួនជនមានពិការភាព ៧ ៥៣៥ នាក់ កំពុងបម្រើការងារ។
ជាមួយគ្នានេះដែរ លោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារីបានលើកឡើងថា បើយោងតាមជំរឿនប្រជាជនទូទៅឆ្នាំ២០១៩-២០២៣ បានបង្ហាញថា ជនមានពិការភាពនៅប្រទេសកម្ពុជាមានចំនួនសរុប ៦៩០ ០០០ នាក់ នៃចំនួនប្រជាជនសរុប ពួកគាត់មានពិការភាពយ៉ាងហោចណាស់ក៏ផ្នែកណាមួយដែរ ក្នុងចំណោមនោះស្រ្តីពិការគឺប្រឈមនឹងបញ្ហាលំបាកច្រើនជាងបុរសពិការ។ លោកជំទាវបានបញ្ជាក់ទៀតថា ការងារពិការភាពមិនមែនជាការងាយស្រួលទេ ត្រូវធ្វើដោយអំណត់ព្យាយាម តស៊ូមតិ ធ្វើជាមួយជនដែលពិការភ្នែក កាយសម្បទា ហើយភាគច្រើនមានការខ្វះខាតក្រីក្រ ទាមទារឱ្យមានការចូលរួមទាំងអស់គ្នា និងប្រើបេះដូង ទឹកចិត្តដើម្បីជួយលើកកម្ពស់ស្ថានភាពរស់នៅរបស់ពួកគាត់។
ក្នុងឱកាសនោះដែរ ឯកឧត្តម នេត្រ ភក្ត្រា បានវាយតម្លៃខ្ពស់ចំពោះការខិតខំប្រឹងប្រែងរបស់ សមាគម និងក្រុមការងារក្នុងការកសាងសមិទ្ធផលយ៉ាងច្រើន ដើម្បីឱ្យបងប្អូនជនមានពិការភាពមានកន្លែងស្នាក់នៅ កន្លែងបណ្តុះបណ្តាលវិជ្ជាជីវៈ ផ្តល់ឱកាសការងារ និងមុខរបរ ជួយសម្របសម្រួល និងដោះស្រាយរាល់ការលំបាកផ្សេងៗ ពិសេសរួមចំណែកលើកកម្ពស់ជីវភាពរស់នៅរបស់បងប្អូនជនមានពិការភាព និងក្រុមគ្រួសាររបស់ពួកគាត់។ ឯកឧត្តមបានថ្លែងការកោតសរសើរដល់បងប្អូនជនមានពិការភាព ដែលបានខិតខំប្រឹងប្រែងរៀនសូត្រ និងប្រកបមុខរបរចិញ្ចឹមជីវិតតាមកម្លាំង និងសមត្ថភាពរបស់ខ្លួន។ ឯកឧត្ដមរដ្ឋមន្រ្ដីបានអះអាងថា កត្តាទាំងនេះបានឆ្លុះបញ្ចាំងពីភាពតស៊ូ អត់ធន់ និងភាពរឹងមាំក្នុងការចូលរួមក្នុង សកម្មភាពនានានៅក្នុងសង្គមជាតិ។
ឯកឧត្តម នេត្រ ភក្រ្ដា រដ្ឋមន្រ្តីក្រសួងព័ត៌មានក៏បានអំពាវនាវដល់បណ្តាស្ថាប័នពាក់ព័ន្ធនានា ចូលរួមចំណែកក្នុងការលើកកម្ពស់ការយកចិត្តទុកដាក់លើបងប្អូនជាជនមានពិការភាព ហើយស្នើឱ្យស្ថាប័នវិទ្យុរដ្ឋ និងឯកជន ទទួលជនមានពិការភាពចូលបម្រើការងារ ឱ្យបានក្នុងអត្រា ២% សម្រាប់ វិស័យរដ្ឋ និង ១% សម្រាប់ វិស័យឯកជន តាមអត្រាកំណត់ ក្នុងច្បាប់។ ទន្ទឹមនេះ ឯកឧត្ដមរដ្ឋមន្រ្ដីក៏បានស្នើឱ្យស្ថាប័នវិទ្យុ ទូរទស្សន៍ និងអង្គភាពព័ត៌មានយកចិត្តទុកដាក់បន្តផ្សព្វផ្សាយអំពីបញ្ហាពិការភាព ដើម្បីឱ្យប្រជាពលរដ្ឋបានយល់ដឹងដោយគ្មានការរើសអើង។ លើសពីនេះទៀតឯកឧត្ដមក៏ស្នើ ឱ្យអគ្គនាយកដ្ឋានទូរទស្សន៍ជាតិ (ទទក) រៀបចំវេទិកាតុមូល ដើម្បី ពិភាក្សាអំពីបញ្ហាពិការភាព និងច្បាប់ស្តីពីកិច្ចការពារ និងលើកកម្ពស់សិទ្ធិជនមានពិការភាព។
សូមជម្រាបជូនថា សម្រាប់សិក្ខាកាមជាជនមានពិការភាព ទទួលបានវិញ្ញាបនបត្របញ្ជាក់ការសិក្សាផ្នែកអានព័ត៌មាន សរសេរព័ត៌មាន ចំនួន ៤៩ នាក់ និងផ្នែកចម្រៀងសម័យចំនួន ១៩ នាក់៕
ប្រភព : ក្រសួងព័ត៌មាន
