ចាប់ពីថ្ងៃទី២១ ដល់ថ្ងៃទី២៥ ខែវិច្ឆិកា ឆ្នាំ២០២៣នេះ មានសិស្សនិស្សិតចំនួន ១៧៨០នាក់ បានប្រឡងបញ្ចប់ការសិក្សាពីវិទ្យាស្ថានជាតិពហុបច្ចេកទេសកម្ពុជា (NPIC) ក្នុងនោះមាននិស្សិតស្រីចំនួន ៣០៨នាក់។ ការប្រឡងបញ្ចប់ការសិក្សាឆ្នាំ២០២៣នេះ រួមមាននិស្សិតកម្រិតបរិញ្ញាបត្រជាន់ខ្ពស់បច្ចេកទេស ចំនួន១០៣នាក់ និស្សិតកម្រិតបរិញ្ញាបត្របច្ចេកទេស(Engineer) ចំនួន៧៨៣នាក់ និស្សិតកម្រិតសញ្ញាបត្រជាន់ខ្ពស់បច្ចេកទេស(Diploma) ចំនួន៦៦៥នាក់ និងសិស្សកម្រិតសញ្ញាបត្របច្ចេកទេស និងវិជ្ជាជីវៈ ចំនួន២២៩នាក់។
ឯកឧត្តមបណ្ឌិត ប៊ុន ភារិន នាយកវិទ្យាស្ថានជាតិពហុបច្ចេកទេសកម្ពុជា(NPIC) បានបញ្ជាក់ថា ការប្រឡងបញ្ចប់ការសិក្សាសម្រាប់ឆ្នាំ២០២៣នេះ គឺមានទាំងការប្រឡងទ្រឹស្តី ការការពារសារណា និងការបង្ហាញពីស្នាដៃរបស់សិស្សនិស្សិតជាក់ស្តែងតែម្តង។ ចំណែកគណៈកម្មការដែលជាអ្នកវាយតម្លៃក្នុងការប្រឡងនេះ មានការចូលរួមទាំងពីសាស្ត្រាចារ្យជំនាញនៃវិទ្យាស្ថាន NPIC រួមនិងអ្នកជំនាញលើវិស័យនានាមកពីខាងក្រៅវិទ្យាស្ថានផងដែរ ដើម្បីធានាថាសិស្សនិស្សិតដែលបានបញ្ចប់ការសិក្សាគឺជាធនធានមនុស្សប្រកបដោយជំនាញបច្ចេកទេស និងវិជ្ជាជីវៈអាចប្រកបការងារបាន។
លោកសាស្ត្រាចារ្យ ឈុំ អំណត់ ប្រធានដេប៉ាតឺម៉ង់សំណង់ស៊ីវិលនៃវិទ្យាស្ថាន NPIC មើលឃើញថា តាមរយៈការប្រឡងបញ្ចប់ការសិក្សាឆ្នាំនេះ បង្ហាញថាសិស្សនិស្សិតនៃវិទ្យាស្ថាន NPIC កាន់តែមានកម្រិតគុណភាពល្អ ទាំងចំណេះដឹងផ្នែកទ្រឹស្តី និងការអនុវត្តជំនាញផ្ទាល់។ លោកសាស្ត្រាចារ្យ បានបញ្ជាក់ថា សិស្សនិស្សិតដែលបញ្ចប់ការសិក្សាផ្នែកសំណង់ស៊ីវិល ផ្នែកអគ្គិសនី ផ្នែកអេឡិចត្រូនិក មានឱកាសច្រើនក្នុងទីផ្សារការងារ ដោយសារមានគម្រោងសាងសង់សំណង់នានាជាច្រើនក្នុងប្រទេសកម្ពុជាពីមួយឆ្នាំទៅមួយឆ្នាំ។
ចំណែក លោកបណ្ឌិតសាស្ត្រាចារ្យ ចេង ហ៊ឈង ប្រធានមហាវិទ្យាល័យអគ្គិសនី យល់ឃើញថា ក្រៅពីការសិក្សាជំនាញបច្ចេកទេសទាំងទ្រឹស្តី និងការអនុវត្តជាក់ស្តែងហើយនោះ ជំនាញទន់ដែលសំដៅលើសីលធម៌ល្អ ឥរិយាបទល្អ គឺពិតជាសំខាន់ណាស់សម្រាប់សិស្សនិស្សិតអាចក្លាយជាធនធានមនុស្សដ៏ល្អនៅពេលចេញបំពេញការងារ។ ដូចនេះ ទើបវិទ្យាស្ថាន NPIC បានបូកបញ្ចូលការសិក្សាជំនាញទន់នេះ សម្រាប់សិស្សនិស្សិតនៅពេលកំពុងសិក្សាជំនាញណាក៏ដោយ។
យុវជន សែម ម៉េងខេង ជានិស្សិតផ្នែកមេកានិករថយន្ត ដែលបានប្រឡងបញ្ចប់ការសិក្សា នៅឆ្នាំ២០២៣នេះ ជឿជាក់ថាជំនាញដែលខ្លួនបានរៀនចប់នេះ នឹងអាចបំពេញក្តីស្រមៃក្នុងការចូលរួមអភិវឌ្ឍន៍វិស័យរថយន្តនៅកម្ពុជា។ ជាក់ស្តែង យុវជនរូបនេះ បានដាក់បង្ហាញស្នាដៃគម្រោងតម្លើងប្រព័ន្ធអគ្គិសនីរថយន្តសម្រាប់ការប្រឡងបញ្ចប់ការសិក្សានេះ ដោយគម្រោងមួយនេះចំណាយពេលប្រមាណជា៦ខែ ដើម្បីបង្កើតចេញជារូបរាងជាក់ស្តែង។
ទន្ទឹមនេះ យុវតី ពៅ ពុធថា ជានិស្សិតផ្នែកមេកានិកទូទៅ ដែលប្រឡងបញ្ចប់ការសិក្សាក្នុងឆ្នាំ២០២៣នេះដែរ មានគម្រោងថានឹងអាចយកជំនាញដែលខ្លួនបានរៀននេះ បើកជារោងជាងផ្នែកក្រឡឹងដោយខ្លួនឯងដែលអាចផ្គត់ផ្គង់តម្រូវការផ្នែករថយន្ត និងនៅតាមរោងចក្រនានា។ យុវតីរូបនេះ លើកទឹកចិត្តដល់យុវតីផ្សេងទៀតចូលរៀនជំនាញមេកានិក រឺជំនាញបច្ចេកទេសផ្សេងទៀតដែលខ្លួនស្រឡាញ់ ដោយកុំគិតថាមនុស្សស្រីរៀនជំនាញទាំងនោះមិនបានអី សំខាន់គឺការតាំងចិត្តរបស់យើង។
សូមបញ្ជាក់ថា វិទ្យាស្ថានជាតិពហុបច្ចេកទេសកម្ពុជា (NPIC) គឺជាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈដ៏ធំមួយ ដែលបានបង្កើតឡើងក្នុងឆ្នាំ២០០៥ ស្ថិតនៅក្រោមក្រសួងការងារ និងបណ្តុះបណ្តាលវិជ្ជាជីវៈ។ ក្នុងឆ្នាំសិក្សា ២០២២-២០២៣ មានសិស្សនិស្សិតសរុបជាង ៦៦០០នាក់ កំពុងសិក្សាជំនាញបច្ចេកទេស និងវិជ្ជាជីវៈ ចាប់ពីថ្នាក់សញ្ញាបត្របច្ចេកទេសនិងវិជ្ជាជីវៈ ថ្នាក់បណ្តុះបណ្តាលវគ្គខ្លី ថ្នាក់ឧត្តមសិក្សា និងថ្នាក់ក្រោយឧត្តមសិក្សា លើជំនាញដូចជា វិស្វកម្មអគ្គិសនី វិទ្យាសាស្ត្រកុំព្យូទ័រ វិស្វកម្មមេកានិក វិទ្យាសាស្ត្រអុបទិក វិស្វកម្មសំណង់ស៊ីវិលនិងស្ថាបត្យកម្ម វិស្វកម្មអេឡិចត្រូនិកនិងទូរគមនាគមន៍ វិស្វកម្មមេកានិករថយន្ត ទេសចរណ៍និងបដិសណ្ឋារកិច្ច៕
