ប្រទេសកូរ៉េខាងជើង កាលពីថ្ងៃទី 20 ខែវិច្ឆិកា ឆ្នាំ2023 បានថ្កោលទោសការលក់អាវុធទំនើបៗដ៏មានសក្ដានុពលរបស់សហរដ្ឋអាមេរិក ទៅឱ្យប្រទេសជប៉ុន និងកូរ៉េខាងត្បូង ដោយហៅថាជាទង្វើដ៏គ្រោះថ្នាក់ដែលបង្កើនភាពតានតឹងនៅក្នុងតំបន់ និងនាំមកនូវការប្រកួតប្រជែងអាវុធ។
នៅក្នុងសេចក្តីថ្លែងការណ៍មួយ ដែលធ្វើឡើងដោយទីភ្នាក់ងារសារព័ត៌មាន KCNA ក្រសួងការពារជាតិកូរ៉េខាងជើង បាននិយាយថា ទីក្រុងព្យុងយ៉ាង នឹងបង្កើនវិធានការ បង្កើតការរារាំងសង្គ្រាម ដើម្បីឆ្លើយតបទៅនឹងអស្ថិរភាពនៅក្នុងតំបន់ ដែលខ្លួនបាននិយាយថា បណ្តាលមកពីសហរដ្ឋអាមេរិក និងសម្ព័ន្ធមិត្តរបស់ខ្លួន។
ប្រទេសជប៉ុនគ្រោងនឹងទិញមីស៊ីល Tomahawk ចំនួន 400 គ្រាប់ពីសហរដ្ឋអាមេរិក ដែលជាផ្នែកមួយនៃការកសាងយោធាដ៏ធំបំផុតរបស់ខ្លួនចាប់តាំងពីសង្គ្រាមលោកលើកទី 2 ។ មន្ទីរបញ្ចកោណបាននិយាយកាលពីថ្ងៃសុក្រថា ក្រសួងការបរទេសសហរដ្ឋអាមេរិកបានអនុម័តការលក់អាវុធដែលមានសក្តានុពលនៅក្នុងកិច្ចព្រមព្រៀងដែលមានតម្លៃ 2.35 ពាន់លានដុល្លារ។
ថ្មីៗនេះ សហរដ្ឋអាមេរិកក៏បានប្រកាសពីការយល់ព្រមលើការលក់មីស៊ីល Sidewinder និង Standard Missile 6 Block I ទៅកាន់កូរ៉េខាងត្បូងផងដែរ។
សេចក្តីថ្លែងការណ៍របស់កូរ៉េខាងជើងបាននិយាយថា “យើងព្រមានថា សហរដ្ឋអាមេរិកចំណេញកាន់តែច្រើនពីការលក់អាវុធដោយមិនរើសអើង ប៉ុន្តែនឹងត្រូវចំណាយកាន់តែច្រើនសម្រាប់វិបត្តិសន្តិសុខ” ។
ក្រុងព្យុងយ៉ាងបានកំពុងរិះគន់អ្វីដែលខ្លួនហៅថា “ការគំរាមកំហែងផ្នែកយោធា” ពីសហរដ្ឋអាមេរិកនិងសម្ព័ន្ធមិត្តដោយនិយាយថាខ្លួននឹងបង្ហាញពី “សមត្ថភាពវាយលុកលើសលប់បន្ថែមទៀត” ក្នុងការឆ្លើយតប៕
