ទ្រព្យសម្បត្តិរបស់នាយកប្រតិបត្តិ Nvidia លោក Jensen Huang បានកើនឡើងខ្លាំងនាពេលថ្មីៗនេះ ខណៈដែលក្រុមហ៊ុនដែលលោកបានបង្កើតនៅឆ្នាំ1993 បានកើនឡើងតម្លៃភាគហ៊ុន គួរអោយកត់សម្គាល់។
ឥឡូវនេះត្រូវបានចាត់ថ្នាក់ដោយ Bloomberg ថាជាមហាសេដ្ឋីលំដាប់ទី 21 នៅលើពិភពលោក លោក Huang បានពង្រីកទ្រព្យសម្បត្តិរបស់ខ្លួនរហូតដល់8.5 ពាន់លានដុល្លារ ខណៈដែលតម្លៃភាគហ៊ុនរបស់ក្រុមហ៊ុនលោកបានកើនឡើង 15% នៅក្នុងអំឡុងពេលជួញដូរផ្សារហ៊ុន។
លោក Huang អាយុ 61 ឆ្នាំឥឡូវនេះមានទ្រព្យសម្បត្តិប្រមាណ 68.1 ពាន់លានដុល្លារ ខណៈបញ្ជីអ្នកមាននៅលើពិភពលោកត្រូវបាននាំមុខដោយ Elon Musk, Bernard Arnault និង Jeff Bezos ។
លោក Huang បានកាន់មុខតំណែងរបស់ Nvidia តាំងពីដើមមក ដោយបម្រើការជាសហស្ថាបនិក នាយកប្រតិបត្តិ ប្រធាន និងសមាជិកក្រុមប្រឹក្សាភិបាល។លោក កាន់កាប់ប្រហែល 3% នៃក្រុមហ៊ុន។
អ្នកដឹកនាំបច្ចេកវិទ្យាដែលកើតនៅតៃវ៉ាន់រូបនេះបានចូលរៀននៅសាកលវិទ្យាល័យ Oregon State និងសាកលវិទ្យាល័យ Stanford មុនពេលធ្វើការនៅក្រុមហ៊ុនបន្ទះឈីបប LSI Logic និង Advanced Micro Devices (AMD) ហើយបន្ទាប់មកបើកដំណើរការ Nvidia ជាមួយ Chris Malachowsky និង Curtis Priem៕
