លោកប្រធានាធិបតី Joko Widodo បាននិយាយនៅថ្ងៃច័ន្ទ ទី០៤ ខែធ្នូ ឆ្នាំ២០២៣ថា ប្រទេសឥណ្ឌូនេស៊ី នឹងប្រកាសអំពីចំណាប់អារម្មណ៍របស់ខ្លួនចំពោះស្ថាប័នគ្រប់គ្រងបាល់ទាត់ពិភពលោករបស់ FIFA ក្នុងការរួមគ្នារៀបចំការប្រកួតបាល់ទាត់ពិភពលោក U-20 ឆ្នាំ ២០២៥ ជាមួយប្រទេសសិង្ហបុរី។
លោកបានប្រាប់អ្នកយកព័ត៌មាននៅទីក្រុងហ្សាកាតា ដោយសំដៅទៅលើសមាគមបាល់ទាត់របស់ប្រទេសឥណ្ឌូនេស៊ីថា “សេចក្តីប្រកាស ត្រូវបានចុះហត្ថលេខាដោយសហព័ន្ធបាល់ទាត់ឥណ្ឌូនេស៊ី PSSI និងសហព័ន្ធបាល់ទាត់សិង្ហបុរី (FAS) ។ ខ្ញុំជឿថា សិង្ហបុរី និងឥណ្ឌូណេស៊ីអាចធ្វើជាម្ចាស់ផ្ទះដ៏ល្អ”។
ដោយឡែក កាលពីថ្ងៃច័ន្ទ កន្លងទៅ សហព័ន្ធបាល់ទាត់សិង្ហបុរី FAS បាននិយាយថា លិខិតបំណងពិភាក្សា និងពិចារណារួមគ្នាក្នុងការធ្វើជាម្ចាស់ផ្ទះនៃការប្រកួតបាល់ទាត់ពិភពលោកអាយុក្រោម 20ឆ្នាំ និងក្រោម 17 ឆ្នាំ នាពេលអនាគតជាមួយប្រទេសឥណ្ឌូនេស៊ីចាប់ពីឆ្នាំ 2025 ត្រូវបានដាក់ជូនទៅ FIFA រួចរាល់ហើយ។ ប្រទេសឥណ្ឌូណេស៊ីបានធ្វើជាម្ចាស់ផ្ទះក្នុងការប្រកួតបាល់ទាត់ពិភពលោក U-17 ដែលបានបញ្ចប់កាលពីពេលថ្មីៗនេះ ដែលអាល្លឺម៉ង់ បានក្លាយជាជើងឯក។ គួរឱ្យដឹងថា U-20 World Cup គឺជាព្រឹត្តិការណ៍ប្រចាំឆ្នាំ ខណៈដែល U-17 World Cup នឹងក្លាយជាការប្រកួតប្រចាំឆ្នាំចាប់ពីឆ្នាំ 2025 តទៅ៕
