ប្រធានាធិបតីកូរ៉េខាងត្បូង លោក Yoon Suk Yeol បាននិយាយកាលពីពេលថ្មីៗនេះ ថា ប្រទេសរបស់លោកនឹងវិនិយោគ 6.94 ពាន់លានដុល្លារ លើបច្ចេកវិទ្យាបញ្ញាសិប្បនិមិត្ត Ai នៅឆ្នាំ 2027 ដែលជាផ្នែកនៃកិច្ចខិតខំប្រឹងប្រែងដើម្បីរក្សាតំណែងឈានមុខគេលើពិភពលោកនៅក្នុងបន្ទះឈីប semiconductor។
Semiconductors គឺជាមូលដ្ឋានគ្រឹះដ៏សំខាន់នៃសេដ្ឋកិច្ចជំរុញការនាំចេញរបស់ប្រទេសកូរ៉េខាងត្បូង។ នៅក្នុងខែមីនា កន្លងទៅ ការនាំចេញបន្ទះឈីបបានឈានដល់កម្រិតខ្ពស់បំផុតរបស់ពួកគេក្នុងរយៈពេល 21 ខែ ក្នុងតម្លៃ 11.7 ពាន់លានដុល្លារ ឬជិតមួយភាគប្រាំនៃការនាំចេញសរុប។
ប្រធានាធិបតីកូរ៉េខាងត្បូង លោក Yoon បានប្រាប់កិច្ចប្រជុំរបស់អ្នកបង្កើតគោលនយោបាយ និងនាយកប្រតិបត្តិឧស្សាហកម្មបន្ទះឈីប ថា “ការប្រកួតប្រជែងនាពេលបច្ចុប្បន្ននៅក្នុង semiconductors គឺជាសង្រ្គាមឧស្សាហកម្ម និងសង្រ្គាមទាំងស្រុងរវាងប្រទេសនានា” ។
រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា តាមរយៈការបោះទុនវិនិយោគ និងមូលនិធិមួយ ប្រទេសកូរ៉េខាងត្បូងគ្រោងនឹងពង្រីកការស្រាវជ្រាវ និងការអភិវឌ្ឍន៍យ៉ាងសំខាន់នៅក្នុងបន្ទះឈីប AI។
អាជ្ញាធរកូរ៉េខាងត្បូងក៏នឹងជំរុញការអភិវឌ្ឍន៍នៃបច្ចេកវិទ្យាបញ្ញាទូទៅសិប្បនិម្មិត (AGI) ជំនាន់ក្រោយ និងបច្ចេកវិទ្យាសុវត្ថិភាពដែលលើសពីម៉ូដែលដែលមានស្រាប់។ លោក Yoon បានកំណត់គោលដៅសម្រាប់កូរ៉េខាងត្បូងដើម្បីក្លាយជាប្រទេសមួយក្នុងចំណោមប្រទេសកំពូលទាំងបីនៅក្នុងបច្ចេកវិទ្យា AI រួមទាំងបន្ទះឈីប ហើយយកចំណែកទីផ្សារ 10% ឬច្រើនជាងនេះនៃទីផ្សារប្រព័ន្ធអេឡិចត្រូនិកពិភពលោកនៅឆ្នាំ 2030៕
