មហាក្សត្រដែលមានជាងគេបំផុតទាំងប្រាំរបស់អាស៊ីមានទ្រព្យសម្បត្តិសរុបប្រមាណ 108 ពាន់លានដុល្លារអាមេរិក ដោយព្រះមហាក្សត្រ Vajiralongkorn នៃប្រទេសថៃ និងស្តេចស៊ុលតង់ Hassanal Bolkiah នៃប្រទេសប្រ៊ុយណេ មានទ្រព្យសម្បត្តិច្រើនជាងគេបង្អស់។
នៅកំពូលនៃបញ្ជីគឺស្តេច Vajiralongkorn នៃប្រទេសថៃ ជាមួយនឹងទ្រព្យសម្បត្តិប៉ាន់ស្មានចំនួន 43 ពាន់លានដុល្លារអាមេរិក ដូចដែលបានរាយការណ៍ដោយ The Business Standard។ ទ្រព្យសម្បត្តិដ៏ច្រើនមហាសាលរបស់ទ្រង់ ភាគច្រើនបានមកពីអចលនទ្រព្យ ដែលបង្កើតបានជាចំណែកដ៏ធំបំផុតនៃទ្រព្យសម្បត្តិរបស់ទ្រង់។ ទស្សនាវដ្ដី Fortune រាយការណ៍ថាទ្រង់ កាន់កាប់ដីយ៉ាងហោចណាស់ 65.6 គីឡូម៉ែត្រការ៉េនៅទូទាំងប្រទេសថៃ រួមទាំងតំបន់មានតម្លៃខ្ពស់នៅទីក្រុងបាងកក ដែលមានតម្លៃប្រហែល 30 ពាន់លានដុល្លារ។
លើសពីនេះ ព្រះមហាក្សត្រថៃ ទទួលបានអត្ថប្រយោជន៍ពីប្រភពចំណូលចម្រុះ ដោយកាន់កាប់ភាគហ៊ុនសំខាន់ៗនៅក្នុងអង្គភាពហិរញ្ញវត្ថុ និងឧស្សាហកម្មសំខាន់ៗមួយចំនួនរបស់ប្រទេសថៃ។ នេះរួមបញ្ចូលទាំងភាគហ៊ុន 23ភាគរយ នៅក្នុងក្រុមហ៊ុនផ្តល់ប្រាក់កម្ចីធំទីពីររបស់ប្រទេសថៃ ធនាគារ Siam Commercial Bank និងភាគហ៊ុន 33ភាគរយ នៅក្នុង Siam Cement Group ដែលជាក្រុមហ៊ុនឧស្សាហកម្មឈានមុខគេរបស់ប្រទេសនេះ ជាមួយនឹងភាគហ៊ុនរបស់ទ្រង់ដែលមានតម្លៃប្រហែល 9 ពាន់លានដុល្លារ។ ទ្រង់ ក៏មានយន្តហោះជិត 38 គ្រឿង យានជំនិះលំដាប់ខ្ពស់ 300 គ្រឿង ទូកជាង 50 គ្រឿង និង គ្រឿងអលង្ការ ត្បូងពេជ្រជាច្រើនផងដែរ៕
