យោងតាមការសិក្សាថ្មីមួយ បានឱ្យដឹងថា រដ្ឋធានីហ្សាកាតារបស់ប្រទេសឥណ្ឌូនេស៊ី គឺជាទីក្រុងដែលមានការបំពុលខ្លាំងបំផុតលើពិភពលោក។
រដ្ឋមន្ត្រីក្នុងប្រទេសអាស៊ីអាគ្នេយ៍មួយនេះ បានបញ្ជាក់កាលពីពេលថ្មីៗនេះថា ប្រធានាធិបតី Joko Widodo មានអាការៈក្អកអស់រយៈពេលជាច្រើនសប្តាហ៍ ហើយបានស្នើថា នេះអាចទាក់ទងនឹងការបំពុលខ្យល់កាន់តែអាក្រក់ទៅៗ នៅក្នុងទីក្រុងហ្សាកាតា ដែលមានមនុស្សរស់នៅចំនួន 10 លាននាក់។
ដំណឹងនេះបានកើតឡើងតែប៉ុន្មានថ្ងៃបន្ទាប់ពីក្រុមហ៊ុនស្វីស IQAir បានចេញផ្សាយទិន្នន័យដែលបង្ហាញថា គុណភាពខ្យល់របស់ទីក្រុងហ្សាកាតាបានធ្លាក់ចុះក្នុងរយៈពេលប៉ុន្មានសប្តាហ៍ថ្មីៗនេះ ហើយបានប្រែក្លាយជាទីក្រុងដែលមានខ្យល់បំពុលអាក្រក់បំផុតនៅក្នុងពិភពលោក។
“ប្រធានាធិបតី Joko Widodo បានស្នើសុំឱ្យមានជំហានជាក់ស្តែង (ដើម្បីដោះស្រាយការបំពុលបរិយាកាស) ក្នុងរយៈពេលមួយសប្តាហ៍។ លោកបានក្អកអស់រយៈពេលជិតបួនសប្តាហ៍ហើយ ហើយបាននិយាយថា លោកមិនដែលមានអាការៈ បែបនេះទេ”។ នេះបើយោងតាម រដ្ឋមន្ត្រីទេសចរណ៍ និងសេដ្ឋកិច្ចច្នៃប្រឌិតរបស់ឥណ្ឌូនេស៊ី លោក Sandiaga Uno បានប្រាប់អ្នកសារព័ត៌មានបន្ទាប់ពីកិច្ចប្រជុំសភារវាងរដ្ឋមន្ត្រីក្នុងទីក្រុងហ្សាការតា ។
លោក Uno បាននិយាយថា គ្រូពេទ្យនៅតែធ្វើការវិនិច្ឆ័យរកមូលហេតុនៃការក្អករបស់ប្រធានាធិបតី Widodo ប៉ុន្តែបានបន្ថែមថា នេះអាចទាក់ទងនឹងគុណភាពខ្យល់ដែលកាន់តែអាក្រក់ទៅៗ។ នេះបើតាមការចុះផ្សាយរបស់សារព័ត៌មាន CNN របស់ឥណ្ឌូនេស៊ី។
នៅថ្ងៃបន្ទាប់ រដ្ឋមន្ត្រីក្រសួងសុខាភិបាល Budi Gunadi Sadikin ក៏បានកត់សម្គាល់ផងដែរថា លោកប្រធានាធិបតីកំពុងមានអាការៈ ក្អក ហើយបាននិយាយថា ក្រសួងរបស់លោកកំពុងបង្កើនការធ្វើតេស្តលើប្រជាជនទូទៅ ដើម្បីមើលថាតើមានការកើនឡើងនៃជំងឺសួត និងផ្លូវដង្ហើម ដូចជាជំងឺហឺត នៅក្នុងតំបន់ដែលមានការបំពុលខ្លាំងដែរឬយ៉ាងណា៕
