រដ្ឋាភិបាលសហរដ្ឋអាមេរិក កំពុងរៀបចំផែនការផ្លាស់ប្តូរស្តង់ដារ នៃការបំភាយឧស្ម័នរថយន្ត ដែលនេះមានន័យថាក្រុមហ៊ុនផលិតរថយន្តនឹងត្រូវលក់រថយន្តអគ្គិសនីឱ្យកាន់តែច្រើនជាងមុន។ នៅឆ្នាំ 2032 រថយន្តអគ្គិសនីនឹងត្រូវបានផលិត ក្នុងចំនួនប្រហែល 2ភាគ3 នៃរថយន្តថ្មីទាំងអស់ដែលដាក់លក់នៅអាមេរិក។
បើគ្មានតម្រូវការទាំងនេះទេ រថយន្តអគ្គិសនីនឹងឈានដល់ចំណែកទីផ្សារខ្ពស់ នៅពេលណាមួយបន្ទាប់ពីឆ្នាំ 2035។ នេះបើយោងតាមអ្នកវិភាគឧស្សាហកម្មរបស់ Moody’s Matthias Heck ។ លោកបាននិយាយថា គោលដៅដែលដាក់ចេញដោយ EPA គឺអាចគ្រប់គ្រងបាន ប៉ុន្តែវានឹងមិនងាយស្រួលនោះទេ ហើយត្រូវការកម្រិតនៃការវិនិយោគខ្ពស់។
ក្នុងរយៈពេលមួយទសវត្សរ៍ខាងមុខ អ្វីៗនឹងផ្លាស់ប្តូរច្រើន រួមទាំងហេដ្ឋារចនាសម្ព័ន្ធ ការសាកថ្មរថយន្ត និងយានជំនិះបើកបរស្វ័យប្រវត្តិដោយខ្លួនឯង។ អ្នកប្រើប្រាស់នឹងត្រូវបានទាក់ទាញឱ្យប្រើប្រាស់រថយន្តអគ្គិសនីកាន់តែច្រើន ដោយសារបច្ចេកវិទ្យាថ្មមានភាពប្រសើរឡើង និងតម្លៃរបស់វាក៏ធ្លាក់ចុះ។ លោក Chris Harto អ្នកវិភាគគោលនយោបាយសម្រាប់ការដឹកជញ្ជូន និងថាមពលនៅ Consumer Reports បាននិយាយថា នេះជារឿងសំខាន់ដែលត្រូវចងចាំថា ជិតមួយទស្សវត្សចាប់ពីពេលនេះតទៅ រថយន្តអគ្គិសនីនឹងខុសពីអ្វីដែលមាននៅលើទីផ្សារនាពេលបច្ចុប្បន្ននេះ។
លោក Harto បាននិយាយថា ក្នុងពេលជាមួយគ្នានោះ រយៈពេលនៃការបើកបរនឹងបានយូរជាងមុន ហើយការសាកថ្មលឿននឹងកាន់តែងាយស្រួល ដោយម្ចាស់រថយន្តនឹងរីករាយជាមួយនឹងការចំណាយថ្លៃចំណាយ។ ប្រភពខាងលើ បានព្យាករណ៍ថា អាគុយឡាន EV ជំនាន់ក្រោយ ដែលនឹងមកដល់ក្នុងប៉ុន្មានឆ្នាំខាងមុខនឹងអាចប្រើបានយូរជាងមុន 30ភាគរយ បន្ថែមទៀត ហើយនឹងបញ្ចូលថ្មលឿនជាងមុន 30 ភាគរយដូចគ្នា៕
