សហភាពអឺរ៉ុបបានព្រមានលោក Mark Zuckerberg ជុំវិញការរីករាលដាលនៃ “ព័ត៌មានមិនពិត” នៅលើវេទិកាប្រព័ន្ធផ្សព្វផ្សាយសង្គម Meta បន្ទាប់ពីការវាយប្រហាររបស់ពួកហាម៉ាស លើអ៊ីស្រាអែល។
EU បានប្រាប់ Meta ដែលជាម្ចាស់ Facebook និង Instagram ថាខ្លួន “មានពេល 24 ម៉ោង” ដើម្បីឆ្លើយតប និងគោរពតាមច្បាប់អឺរ៉ុប។ ក្រុមហ៊ុនប្រព័ន្ធផ្សព្វផ្សាយសង្គមបានឃើញការកើនឡើងនៃព័ត៌មានមិនពិតអំពីជម្លោះ រួមទាំងរូបភាព និងវីដេអូដែលត្រូវបានគេ កាត់ត និង ប្រឌិត។
អ្នកនាំពាក្យ Meta បានប្រាប់ BBC ថា “បន្ទាប់ពីការវាយប្រហារភេរវកម្មដោយក្រុម Hamas លើអ៊ីស្រាអែលកាលពីថ្ងៃសៅរ៍ យើងបានបង្កើតឡើងយ៉ាងឆាប់រហ័សនូវមជ្ឈមណ្ឌលប្រតិបត្តិការពិសេសមួយដែលមានបុគ្គលិកជាមួយនឹងអ្នកជំនាញ រួមទាំងអ្នកនិយាយភាសាហេប្រ៊ូ និងភាសាអារ៉ាប់យ៉ាងស្ទាត់ជំនាញដើម្បីតាមដាន និងឆ្លើយតបយ៉ាងដិតដល់ចំពោះស្ថានភាពវិវត្តន៍យ៉ាងឆាប់រហ័សនេះ។”
ប្រភពខាងលើបន្តថា “ក្រុមរបស់យើងកំពុងធ្វើការគ្រប់ពេល ដើម្បីរក្សាវេទិការបស់យើងឱ្យមានសុវត្ថិភាព ចាត់វិធានការលើខ្លឹមសារដែលបំពានគោលការណ៍របស់យើង ឬច្បាប់ក្នុងតំបន់ និងសម្របសម្រួលជាមួយអ្នកត្រួតពិនិត្យការពិត ភាគីទីបីនៅក្នុងតំបន់ ដើម្បីកំណត់ការរីករាលដាលនៃព័ត៌មានមិនពិត។ យើងនឹងបន្តការងារនេះ ខណៈដែលជម្លោះនេះនៅតែបន្តកើតឡើង”។
ទន្ទឹមនឹងនោះ គណៈកម្មការអឺរ៉ុបបានក្រើនរំលឹកដល់ក្រុមហ៊ុនប្រព័ន្ធផ្សព្វផ្សាយសង្គមទាំងអស់ថា ពួកគេតម្រូវឱ្យស្របច្បាប់ក្នុងការទប់ស្កាត់ការរីករាលដាលនៃខ្លឹមសារដែលបង្កគ្រោះថ្នាក់ទាក់ទងនឹងក្រុមសកម្មប្រយុទ្ធប៉ាឡេស្ទីន Hamas ដែលជាក្រុមភេរវករដែលបានកំណត់នៅក្នុងសហភាពអឺរ៉ុប៕
